РУСКИ КЕРЕСТУР – Промоция лїстини „Александар Вучич – Зєдинєна Сербия”, хтора на Парламентарних виберанкох будзе под числом 1, у скоро шицких населєних местох општини Кула одвива ше преважно на штандох, дзе активисти бешедую зоз гражданами а векши предвиберанково сходи зоз представнїками лїстини у општини Кула ище нє були отримани.
Як мож пречитац на фейсбук боку „Сербска напредна странка Кула”, активисти месних одборох тей странки зоз Червинки, Сивцу, Руского Керестура и Липару прешлого викенду орґанизовали информативни штанди же би бешедовали зоз своїма согражданами о потребох, предкладох и суґестийох, як и о темох хтори важни за каждодньови живот у нашей општини. Далєй ше наводзи же нєпоштредни контакт зоз гражданами то нагода же би ше чули їх думаня, вичерали идеї и побешедовало о тим цо важне за кажде место и цалу општину.
У єдней обяви на фейсбук боку „Сербска напредна странка Кула” наведзене же моц Сербскей напредней странки видно у довирию гражданох, заєднїцкей роботи и порихтаносци же би ше каждодньово бешедовало о питаньох хтори важни за нашу заєднїцу. Активисти месних одборох бешедую зоз согражданами и кажди раз ше прешвечую же иснує моцна потримовка политики хтора заснована на роботи, одвичательносци и конкретних резултатох. Предлужує ше дошлїдно, зоз своїма согражданами, зоз ясним цильом дальшого розвою нашей општини и лєпшей будучносци за шицких єй гражданох. Дзекую шицким хтори им указую довириє и потримую политику континуитета и напредованя, зоз Александром Вучичом и Сербску напредну странку.