ВУКОВАР (ГОРВАТСКА) – Пияток, 9. октобра, у Велькей сали Горватского дому Вуковар отримана 4. Литературно-музична манифестация Стих коло стиха – здогадованє на Осифа Костелника.
На програми були присутни: предсидатель Ради рускей националней меншини городу Вуковару Зденко Бурчак, представнїк Управного оддзелєня городу Вуковару Йосип Палош, член Совиту за национални меншини Републики Горватскей (РГ) Звонко Костелник, парох вуковарскей грекокатолїцкей церкви Христа Царя о. Олеґ Закалюк и петровски парох о. Владимир Седлак. Зоз пригоднима словами присутним ше обрацели Звонко Костелник и Йосип Палош.
У тогорочней програми участвовали домашнє КУД Осиф Костелник Вуковар, КУД Яким Гарди Петровци, КУД Яким Ґовля Миклошевци, Руснак Дружтво Руснацох у Републики Горватскей Петровци, КД Руснацох Винковци, КД Руснацох Осиєк, КД Руснацох Цвелфериї Раєво Село, словацке КУД Людевит Штур Илок, а пришли и госци зоз Войводини, КУД др Гавриїл Костельнїк Кула.
Пречитана крадка, алє богата биоґрафия Осифа Костелника, а тогорочна тема манифестациї були його есеї о статї.
Циль манифестациї популаризовац творчосц руского писателя и интелектуалца походзеньом зоз Петровцох по хторим вуковарске руске КУД ноши мено, попри того популаризовац и прешириц любов ґу поетскей творчосци през представянє найудатнєйшей рускей поезиї и прози витвореней на нашим просторе.
Орґанизатор манифестациї Союз Русинох РГ и КУД Осиф Костелник Вуковар, а з финансийну потримовку городу Вуковару, Совиту за национални меншини РГ и Ради рускей националней меншини городу Вуковару.
