БЕОҐРАД – Републична виберанкова комисия преглашела и другу лїстину рускей националней меншини котра будзе участвoвац на наиходзацих виберанкох за национални совити.
Лїстину придала Ґрупа виберачох Щиро за Рускинї и Руснацох – проф. др Михайло Фейса, будзе ношиц назву „Щиро за Рускинї и Руснацох – проф. др Михайло Фейса”.
Перши на нєй проф. др Михайло Фейса, универзитетски професор руского и анґлийского язика зоз Коцура, други Владо Джуджар, технїчни редактор радия Руски Керестур зоз Керестура, треца Наташа Макаї Мудрох, фахова воспитачка зоз Сримскей Каменїци.
Надалєй, штварте место на лїстини др Валентина Чизмар, доктор филозофиї зоз Нового Саду, Татяна Колєсар, кнїжнїчарка зоз Коцура, Владимир Дудаш, вкв автомеханїчар зоз Руского Керестура, а на седмим месце проф. др Юлиян Рамач, доктор руского язика у пензиї зоз Коцура.
Потим, на осмим месце Давор Сабо, дипл. инжинєр маст. зоз Нового Саду, Силвия Маґоч, студентка зоз Коцура, Вира Баїч, редакторка зоз Нового Саду, Татяна Горняк, психолоґиня зоз Коцура, Владимир Лазор, правнїк зоз Кули, Зденко Лазор, професор русийского язика зоз Бикич Долу, Адрияна Фейди, медицинска шестра-технїчар зоз Руского Керестура.
Петнасти на лїстини Иван Новак, поднїматель зоз Коцура, Саня Тиркайло, прекладателька зоз Шиду, Татияна Скубан Тодорович, маст. воспитач, професорка класней настави зоз Коцура, и на дзеветнастим месце Владимир Бучко, дипл. машински инжинєр зоз Кули.
На наиходзацих виберанкох за нове зволанє Националного совиту рускей националней меншини котри буду отримани 8. новембра, тота лїстина ше будзе находзиц под числом 2. на гласацких лїсткох.