РУСКИ КЕРЕСТУР – У Основней и штреднєй школи зоз домом школярох Петро Кузмяк у Руским Керестуре, Тидзень дзецка означени од 5. по 9. октобер зоз численима креативнима активносцами хтори були пошвецени дзецинским правом, товаришству, медзисобному почитованю и креативному виражованю, а под слоґаном: Же би дзеци щешлїви були – любов и почитованє, а нє сила!
Школяре участвовали у рижних спортских бавискох и змаганьох, психолоґийних и педаґоґийних роботньох, математичних активносцох, еколоґийней акциї у хторей ушорйовали школски двор, як и у креативним проєкту зоз чаривнима ковертами, у хторих ше находзели нєзвичайни приповедки, а хтори наставали през мриї школярох рижних ґенерацийох.
Програма облапела и упознаванє зоз полицийну униформу, годзину сербского язика през шпиванку и рух, крос, представянє нєзвичайних фризурох, рихтанє колачох у активносци Рука у цесту, та и промоцию школи осмаком зоз Лалитю.
Орґанизовани активносци мали циль порушац друженє, тимску роботу, креативносц и ученє през искуство, а зоз надпомнуцом о важносци безпечного окруженя, у хторим ше почитую шицки права и потреби каждого дзецка.
