РУСКИ КЕРЕСТУР – У парохиї св. отца Миколая прешлого тижня було вельо активносци у християнскей заєднїци.
Октобер то мешац молитви до Пречистей Дїви Мариї, молитви дзецох за мир и мешац пошвецени старим. Каждого вечара пред Службу Божу ше модлї пацерки, бо октобер мешац Пацеркох, през „Ружанєцˮ вирни ше обрацаю до Пречистей Дїви Мариї.
Од пондзелку, 12. октобра, пондзелково вечарши Служби ше служа у Старим манастире.
Всоботу, 10. октобра ш. Авґустина Илюк у Центре св. Йосафати орґанизовала модлєнє пацеркох, та ше дзеци зоз Дружтва св. о. Миколая придружели акциї Милион дзеци ше модля пацерки. То медзинародна инициятива у хторей ше збераю дзеци зоз цалого швета у заєднїцкей молитви за мир у швеце, єдинство и любов медзи людзми.
Дзеци ше вєдно у цалим швеце модля пацерки у чаше од 1. до 7. октобер, а прешлого року ше модлєли дзеци зоз 140 державох.