ПЕТРОВЦИ (РЕПУБЛИКА ГОРВАТСКА) – У рамикох 16. Културней манифестациї „Кед голубица лєцела” котра була отримана прешлого викенду у Републики Горватскей, у Старих Янковцох и Петровцох, отримане и зашеданє Шветовей ради Шветового конґресу Руснацох/Русинох/Лемкох (РРЛ), як и зашеданє Шветового форуму младих РРЛ.
Шветови Конґрес означел 35 роки иснованя и роботи, док Шветови форум младих означел ювилейни 20 роки своєй роботи, шветочно додзелєни припознаня найзаслужнєйшим. Припознаня подзелєл предшедуюци Конґресу Штефан Лявинєц, а достали их Петер Микула, Луция Швецова, и Штефания Ковачова. Пред тим, у Медзилаборцох, исти припознаня додзелєни и шицким представнїком Шветовей ради РРЛ.
На схадзкох анализовани потерашнї активносци, а найвецей часу пошвецене пририхтованю наиходзацого Конґресу. Спред рускей орґанизациї зоз Сербиї присутни бул предсидатель Рускей матки проф. др Михайло Фейса, котри наглашел же схадзка була пошвецена пририхтованю за наиходзаци Шветови конґрес котри заплановани за идуци рок у Мадярскей.
Схадзковали ше и члени Форуму младих РРЛ, а предшедовала Светлана Бойчук котра похвалєла удатну орґанизацию Стретнуца русинскей младежи котре було орґанизоване у авґусту у Новим Орахове у Сербиї. Представнїк зоз Сербиї бул Срдян Ґовля, котри виражел наздаванє же зацикавя цо вецей младих людзох ктори би ше уключели до активносцох рускей заєднїци у своїх державох.