НОВИ САД – Одбор за службене хаснованє язика и писма, вовторок, 22. септембра у просторийох Заводу за културу войводянских Руснацох отримал порядну 9. схадзку на котрей найвецей бешедоване о промоциї уписованя до Окремного виберацкого списку вочи наиходзацим виберанком за национални совити котри буду отримани 8. новембра.
Присутни єдногласно прилапели записнїк зоз прешлей схадзки, потим дискутоване о активносцох предсидателя одбору проф др. Михайла Фейсу медзи двома схадзками, а попри нього присутни були и члени: проф. др Юлиян Рамач, др Светлана Стойков, Анита Ґовля, як и предсидатель НСРНМ Стеван Самочета и секретар Совиту Таня Арва Планчак.
Утвердзене же Одбор за службене хаснованє язика и писма будзе промововац уписованє нових членох до Окременого виберацкого списку, за цо уж пририхтани и промотивни материял.
Прилапени и предклад тексту як часц о службеним хансованю язика и писма у новей Националней стратеґиї, потим ше дискутовало о виробку Словнїка правней терминолоґиї, и учасци у прекладаню елементох за Националну читанку, цо поробела членїца Одбору Гелена Медєши.
Прилапене же Одбор будзе єден зоз орґанизаторох округлого стола за виробок фахових словнїкох зоз вецей обласцох.