ПЕЧИНЦИ – Акредитовани Фахови сход за сценске образованє и воспитанє – Драмска култура, отримани у Културним центре Печинци пияток и всоботу, 2. и. 3. октобра, а на нїм участвовали и три особи зоз нашей заєднїци: Сашо Палєнкаш зоз Руского Керестура, Саша Сабадош зоз Нового Саду и Наташа Еделински Миколка зоз Беркасова.
Початну презентацию отримал Предраґ Момчилович, пресидатель Союзу уметнїцкей творчосци аматерох Войводини, ґлумец Сербского народного театру и професор на Академиї уметносцох у Новим Садзе, а викладаче були преважно професоре зоз Академиї уметносцох як и режисере зоз Театру младих зоз Нового Саду. Даєдни зоз темох роботньох и преподаваньох були поняца, принципи и елементи драмскей творчосци, нєвербални сценски вираз, вокални технїки и друге.
Обуку традицийно орґанизує Союз уметнїцкей творчосци аматерох Войводини и Културни центер Печинци, а змесценє и драгово трошки за членох зоз нашей заєднїци обезпечел Одбор за културу Националного совиту рускей националней меншини.