ВЕРБАС – У Грекокатолїцкей церкви Покрова Пресвятей Богородици у Старим Вербаше внєдзелю, 11. октобра преславене храмове швето – Кирбай.
Преосвящени владика Георгий Джуджар предводзел Архиєрейску службу Божу котра почала на 10 годзин. Окрем владики, на святочним кирбайским богослуженю присуствовали єромонах о. Дамян Кича, ЧСВВ зоз Кули, капелан коцурски о. Иван Дацешен, капелан рускокерестурски о. Михайло Шанта, о. Мирослав Роман Кандрач зоз України, о. Борис Холошняй зоз Дюрдьова, парох нововербаски о. Данил Задрепко, як и домашнї парох старовербаски о. Алексий Гудак.
Церква була полна того дня, вецей як сто парохиянох пришли преславиц тото вельке швето, а богослуженє було прикрашене зоз шпиваньом Церковного хору Грекокатолїцкей церкви Успения Пресвятей Богородици зоз Коцура под руководством Александра Планкоша.
Домашнї парох о. Гудак подзековал владикови Джуджарови на богослуженю и поученю котре пренєсол у своєй казанї, як и шицким священїком, часним шестром, Церковному хору и госцом же пришли возвелїчац швето.
Пре диждж котри нєпреривно падал, по законченей Служби Божей того року нє бул обход коло церкви, як то традиция на тото швето. У одборнїци члени Церковного одбору порихтали ошвиженє и закуску, та вирни после законченя богослуженя остали и препровадзели приємни хвильки у друженю и розгварки.
И того року вашарска часц Кирбаю була у улїчки у котрей ше находзи грекокатолїцка церква у Старим Вербаше. Гоч хвиля була дижджовна, велї столїки зоз рижним понукнуцом, облєчивом, бависками, домашнїма продуктами, лакотками и кирбайскима бомбусами виполнєли улїчку. Поставени бул и забавни парк за наймладших, а було и нащивительох котри шейтали и розпатрали и под амрелами.
