НОВИ САД – Вишло октоберске число Заградки, а зоз ню и додаток – штудиранка.
Октоберска Заградка у рубрики Пречитали и роздумали понука простор за писанє приповедки, Госци и новосци даваю прегляд збуваньох у прешлим мешацу, док рубрика Сцеме знац и упознац представя першокласнїкох зоз Руского Керестура и Коцура.
У Читальнї мож пречитац нову приповедку и писню за дзеци, ту и писньочка у сличкох, a и Мала заградка наймладшим понука литературу и креативни задатки.
Вецей боки и у тим Заградковим чишлє пошвецени школярским и оводарским литературним и подобовим роботом, а у рубрики Док вирошнєм будзем… шивачка Ясна Дюранин представела свойо ремесло.
На Забавних бокох мож ришиц вецей интересантни задатки, Радио у Заградки пошвецени Медзинародному дню дзивчатох, а у рубрики Мой любимец Лена Войнич Тунич зоз Суботици представела читачом свойого пса.
На насловним боку школяре першей класи руского оддзелєня зоз учительку Валерию Папуґа у Коцуре.