ИСТАНБУЛ (ТУРСКА) – Школяре Основней и штреднєй школи зоз домом школярох Петро Кузмяк зоз Руского Керестура, Исак Новта и Кристина Сопка, зоз II-1 оддзелєня Ґимназиї, у провадзеню наставнїци Гелени Пашо Павлович и педаґоґи Марини Дудаш, од 04. по 11. октобер пребували у Истанбулу, у Републики Турскей.
Едукативне путованє була закончуюца часц проєкта Афирмация мултикултурализма и толеранциї у Войводини котре орґанизовал Покраїнски секретарият за образованє, предписаня, управу и национални меншини – национални заєднїци.
Путованє школяром и їх ментором була награда за труд и завжати перши места у юнию на подпроєктох – Камп мултикултурализма у Канїжи як и на етно-кампу – Вєдно на сцени у Новим Кнежевцу.
Школяре и їх ментoрки нащивели Орду улїчку, Капали чаршию, розпатрали варош, були у нащиви Белавей джамиї и Ая Софиї. Нащивели гиподром, палату Топ Капи, обишли Археолоґийни музей, Цистерну базилику Ярбатан, вожели ше по Босфору дзе нащивели Дзивоцку кулу, були на Єгипетским пияцу, а нащивели и Еюп и Балат, як и Васелєнску патрияршию и Долмабахче палату.
Обишли парк Миниатурк, джамию Чамлиджу, Таксим площу и Ґалату кулу, як и Истанбулски аквариюм. Тиж присуствовали и на Турским вечару дзе мали орґанизовану вечеру и фолклорну програму домашнїх.
