БЕОҐРАД – Городски музей Културного центру Вербас представел у Амбасади Републики Ческей у Републики Сербиї виставу найпознатших уметнїцких дїлох Йожефа Пехана з нагоди означованя Дня державносци Републики Ческей.
На подїї присуствовали предсидатель општини Вербас Милан Ґлушац, директор Културного центру Вербас Боян Периз и предсидатель Националного совиту рускей националней меншини Стеван Самочета, вєдно зоз сотруднїками. По словох Самочети, за тоту подїю достал поволанку як предсидатель НСРНМ з цильом предлужованя сотруднїцтва зоз Руснацами, цо уж и розпочате и потвердзене потераз на даскелїх приємох и розгваркох.
Окремну подзековносц Општина Вербас и Городски музей Културного центру Вербас виражели Його екселенциї амбасадорови Републики Ческей у Републики Сербиї Янови Бондийови.
Представянє вистави у тим значним дипломатским и културним просторе представя ище єден крочай у промовованю богатого уметнїцкого нашлїдства уметнїка Йожефа Пехана и културного скарбу Вербасу, як и змоцньованю културних вязох и сотруднїцтва медзи Сербию и Републику Ческу, сообщене зоз Културного центру Вербас.
