Пробуйце почувствовац розлику у значеню медзи шлїдуюцима виреченями:
- а) Меркуй офарбене.
б) Меркуй, офарбене.
- а) Щешлїви сушед!
б) Щешлїви, сушед!
- а) Нє забудз вжац мили ручнїк на базен.
б) Нє забудз вжац, мили, ручнїк на базен.
- а) Вери найс Йован.
б) Вери найс, Йован.
Лєм зоз єдну, односно двома запятами у трецим случаю, тоти виреченя достали цалком иншаке значенє. Хаснованє запяти ше часто занєдзбує, т. є. нє кладзе ше запяту там дзе треба, а без запяти исте виреченє може мац друге значенє.
У 1. прикладу хтошка охабел цидулку зоз надписом: „Меркуй офарбене”. Понеже нє написана запята, тото виреченє нам поручує же треба мерковац на тото цо офарбене, т. є. у буквалним значеню же треба стац при ньому и чувац го. Додатне надпомнуце: анї тото виреченє нє правилне, прето же гуториме мерковац на дацо, а нє меркуєм дацо, алє на цидулки так було написане, та го прето наводзим у ориґиналней форми. Розуми ше же тот хто охабел цидулку нє думал же офарбени предмет треба чувац, алє же лєм треба примерковац же би ше дахто нє опар на ньго.
У 2. прикладу перше виреченє нам гутори же сушед щешлїви и, кед же зме тото сцели и повесц, вец шицко у шоре. Проблем у тим же так хтошка сушедови повинчовал родзени дзень, та випадло як кед би му сцел повесц же даєден сушед щешлїви.
Гришки хтори направени у 3. и 4. прикладу можебуц и найчастейши, бо ридко кеди можеме видзиц же ше кладзе запяту кед ше ословює дакого з меном, або на даяки иншаки способ, а запяту у таких случайох вше треба положиц. Треба написац так:
∎ Щешлїви родзени дзень, Таньо.
∎ Пайташ, вер ми.
∎ Кеди ше, Майо, уж раз рушиме?
Нє забудз вжац мили ручнїк на базен. → значи же комушик гуториме най вежнє ручнїк хтори му мили, т. є. ручнїк хтори люби.
Нє забудз вжац, мили, ручнїк на базен. → значи же комушик хто нам мили надпоминаме най нє забудзе вжац ручнїк.
Вери найс Йован. (тот приклад найдзени на Фейсбуку як коментар на знїмок на хторим Йован грає). → тото виреченє значи же Йован барз красни, а особа хтора тот коментар написала сцела повесц же тото цо Йован одграл барз красне и вец би тот коментар требал випатрац так: Вери найс, Йован.
Фото: pixabay.com