Марина Надь з Руского Керестура почала тренирац карате кед мала лєм пейц роки. Тераз ма уж чарни пас, а однєдавна у Карате клубу „Русин” преноши свойо знанє о тей борительней схопносци и на дзеци. Вредна є школярка першей класи керестурскей Ґимназиї на руским язику, а тиж так є и активна членїца Дома култури Руски Керестур.
Здогадуєш ше же прецо ши теди, на пейц роки, вибрала праве тот спорт?
Марина Надь: Понеже сом була барз нємирне дзецко, полне зоз енерґию, мац знала же ме муши уписац на даяки спорт, та вибрала карате.
Яки награди ши потераз достала?
МН: Найвекша награда ми булo перше место на Европским змаганю. На тим змаганю сом робела и кати, и борби. Попри Европского, достала сом награди и на Державним, Интернационалним и Войводянским змаганю.
А хторе змаганє найбаржeй запаметаш?
МН: Державне змаганє, дзе сом освоєла друге место, алє сом ше барз мушела трудзиц и бориц за ньго.
Як други, а окреме хлапци, реаґую кед чую же маш чарни пас?
МН: Нєсподзиваю ше, прето же им нєкаждодньове же би дзивче тренирало карате, а ище мало и чарни пас. Дакеди ше и вишмеюю.
Покалїчела ши ше дакеди?
МН: Гей. Скоро зоз каждого змаганя ше врацим зоз белавим оком, викривеним ставцом, и вше закончим у дохтора, алє ше то виплацело.
Прецо любиш карате и цо ци тот спорт принєсол?
МН: Любим карате, насампредз, пре тренера Михала Ороса. Вон нам приблїжел шицки боки каратеа и вше нас потримує кед нам нє идзе добре. И друге, карате любим прето же барз добре вплївує на здравє.
Однєдавна тренираш дзеци у „Русину”? Тренираш их сама, чи маш дачию помоц?
МН: Перши два-три тижнї сом их тренирала сама, а вец ми помогнул тренер и Йована Ноґавица.
Активна ши и у култури. Кельо повязани карате и фолклор?
МН: Гей. Фолклор и карате нє барз повязани, алє и за єдно и за друге треба мац схопносци, координацию и ритем.
На кого ше упатраш?
МН: На каратисту Рафаела Aґаєва.
Хто ци найвекша потримовка?
МН: На першим месце – тренер. Вон вше ту дац даяки совит, потримовку и надїю и потолковац цо добре, а цо нє. Алє, ту и родичи и блїзки товарише.
Вше ши упарто тренирала, алє чи дараз було же ци ше нє сцело?
МН: Мала сом вельо таки хвильки. Бул єден период кед сом мешац нє тренирала, алє сом ше врацела, бо сом нє могла вецей витримац лєм шедзиц и нє буц активна. Нормално, було и даяки хвильки кед сом була покалїчена, та сом прето нє могла тренирац.
Чом биш другим препоручела же би тренирали карате?
МН: Карате барз добри за розвиванє цалого цела и добре уплївує на здравє.