СНЇНА (СЛОВАЦКА)/РУСКИ КЕРЕСТУР – Мишани хор Дому култури и Катедралней церкви св. о. Миколая з Руского Керестура 14. и 15. октобра госцовал у Снїни у Словацкей на XXVII Фестивалу духовней писнї, а попри тим, цаловечарши коцерт отримал у Ублї и на Служби Божей у грекокатолїцкей церкви у Пчолинох.
У Ублї керестурски хор наступел 14. октобра у грекокатолїцкей церкви св. Миколая, и под руководительством дириґентки Лидиї Пашо на цаловечаршим концерту виведол духовни и народни репертоар, а привитали их домашнї парох и старостка Ублї.
Ютредзень, 15. октобра, Хор шпивал на Служби Божей у грекокатолїцкей церкви у Пчолинох, а Службу з домашнїм парохом служел и керестурски парох о. Михайло Малацко и домашнї пензионовани парох.
Вєдно з вецей домашнїма хорами и шпивацкима ґрупами, як и госцами з України, Керестурски хор потим наступел у Доме култури у Снїни на Фестивалє духовней писнї, дзе ше представел з духовнима композициями.
З керестурским хором на госцованю були и предсидатель Вивершного одбору Националного совиту Руснацох Желько Ковач и представитель Союзу Руснацох Українцох Сербиї Йоаким Грубеня, понеже Союз бул поштреднїк и участвовал у орґанизациї того госцованя.
Госцованє керестурского хору у Словацкей финансийно потримали Национални совит Руснацох, прей Одбору за службене хаснованє язика и писма, Дом култури Руски Керестур и керестурска парохия св. о. Миколая.
