РУСКИ КЕРЕСТУР – Пецеро Русини з Ужгороду, з України, госци у Руским Керестуре, а медзи нїма и троме маляре – академски Васил Варґа и Васил Дуб, як и Владимир Чума.
Под час нащиви през викенд и вчера маляре обиходзели Керестур, та видзене преношели на малярске платно и так настали даскельо малюнки Водици, Катедралней церкви, Замку и базену.
Орґанизатор тей нащиви Павло Чучка з Ужгороду, котри до Керестура приходзи часто, а на тот завод, як гварел за Рутенпрес, надумали зохабиц и „тварди шлїд”, та шицки малюнки останю Керестурцом.
– Єден малюнок подаруєме до ресторану Лонґов, єден на парохию, єден до Здравственей амбуланти, а наздавам ше же и за други малюнки пренайдземе одвитуюце место – гварел Чучка.
У Керестуре домашнї госцом були Елемир и Ирина Рацово, нащивели и парохию, а Керестурци їх роботу могли провадзиц на местох дзе мальовали. Вчера, остатнї дзень їх нащиви, малюнки були виложени опрез Замку.