НОВИ САД – Предсидателька Шветовей федерациї українских лемковских орґанизацийох (СФУЛО) Ярослава Галик з України вчера, 16. октобра, нащивела НВУ „Руске слово” у Новим Садзе, дзе ю директорка Установи Мартица Тамаш и редакторе виданьох „Руского” упознали з витворйованьом меншинских правох Руснацох у Сербиї.
Як визначела Ярослава Галик, котра на чоло СФУЛО вибрана концом авґуста того року на Шестим Конґресу тей орґанизациї у Львове, то єй перша нащива нашим крайом, а значна є, понеже ше у орґанизацийох у составе СФУЛО з державох на Горнїци, а окреме у Сиверней Америки, о нашей заєднїци мало зна.
На вчерайшим стретнуцу присуствовали и предсидатель и подпредсидатель Союзу Руснацох Українцох Сербиї Боґдан Виславски и Велимир Паплацко, понеже тота орґанизация, як членїца СФУЛО, домашня нащиви панї Галиковей руским и українским орґанизацийом и институцийом у нашей жеми.