Робота и труд победзую талант

автор Ивана Чордаш
1.3k Опатрене

Тамара Когут зоз Нового Саду од пейцох рокох танцовала джез балет у танєчним клубе „Партизан 2” и посцигла значни успихи на змаганьох. Покалїченє ю пред даскельома роками зопарло же би и далєй тренирала, алє нє и же би свойо танєчни схопносци преношела на дзеци.

Но, понеже Тамара тераз студира Фармацию на Медицинским факултету у Новим Садзе, пре мало часу нє сцигує и на други, озбильнєйши обовязки, та направела паузу, гоч ше планує врациц тренирац младших.      

Меняла ши клуби у хторих ши танцовала, чи ши вше була у своїм матичним?

Тамара Когут: Нє меняла сом, бо сом ше у своїм клубе чувствовала як да сом дома зоз свою фамелию.

Дзе ши ходзела на змаганя и хтору награду биш окреме визначела?

ТК: Ходзела сом на вельо змаганя, у Сербиї и вонка з нєй. Од значнєйших наградох визначела бим перше место на европским змаганю у Клаґенфурту у Aвстриї.

Як ши часто мала тренинґи и чи вони були напарти?

ТК: Тренинґи сом мала штири раз до тижня, з тим же сом мала и додатни тренинґи по потреби, бо сом вше давала свой максимум и вец ми було дакус чежко, алє було виводлїве и могла сом шицко витримац.

Foto Emilia Nadj_875x960

Фото: Емилиа Надь

Кеди ши ше покалїчела и чи то було док ши танцовала?

ТК: Покалїчела сом ше пред трома роками. Нє можем повесц же то було пре танцованє, алє найчежше цо сом мушела поробиц  пре покалїченє  то же сом мушела престац тренирац и охабиц танєц.

Потим ши почала робиц як тренер. Кого, дзе и як длуго ши тренирала других?

ТК: Так. Же бим нє зохабела цалком танєц пре тото покалїченє, почала сом робиц як тренер у моїм клубе. Тримала сом тренинґи дзецом од 7 до 11 рокох. То сом робела полни два роки.

Як тераз отримуєш кондицию?

ТК: Углавним ше часто шпацирам, по красней хвилї, гоч и бежанє приходзи до огляду, а дараз пойдзем и до терховальнї.

Цо ци танєц дал, а цо вжал?

ТК: Танєц ме на даяки способ добудовал як особу, научел ме же бим була дисциплинована, осамостоєл, и освидомел ме же споза каждей побиди стої вельо роботи и труду, а после того и тото же сом нашла другу фамелию, а то „Партизан 2”. Тот клуб то место дзе сом шлєбодно могла виражиц свою креативносц. О неґативним боку нє мам нїч цо повесц, бо у моїм случаю красни хвильки висцерали тоти чежки и нєкрасни.

Цо потребне же би дахто бул успишни у тим танцу?

ТК: Робота и труд вше победзую талант. Думам же найбаржей треба мац дзеку и жаданє буц успишни.

Тераз маш даяки гоби?

ТК: Попри танцу, мой гоби тераз музика. Граєм на ґитари, шпивам и пишем писнї, алє нє мам нїяке музичне образованє.

Чи ше плануєш врациц танцовац, лєбо голєм тренирац других?

ТК: Мала сом идею врациц ше ґу танцованю, алє сом нє сиґурна чи бим могла посцигнуц успих и у танцу, и на факултету. Кед найдзем часу, сиґурно ше врацим и будзем тренирац дзеци.

ПОВЯЗАНИ ТЕКСТИ