ШИД – Нєшка рано, у 71. року живота, у Шидзе умар композитор писньох у народним духу и културни дїяч у КПД „Дюра Киш” Славко Загорянски.
Народзел ше 15. децембра 1947. року у Бачинцох. Шейсц класи основней школи закончел у Бачинцох, а 7. и 8. класу у Кукуєвцох. После того закончел стредню тарґовецку школу и здобул званє тарґовца. Полни 40 роки робел як тарґовец по цалей шидскей општини, прейґ Бачинцох, Бикич Долу, Соту, та и по сам Шид.
Музику полюбел од малючка. Окреме любел руску писню. На 17 роки ше научел грац на гармоники и на ґитари. Бул член хору Здруженя пензионерох у Шидзе, дзе наступал и як солист и як инструменталист. Попри тим, бул и активни член КПД „Дюра Киш” у Шидзе.
Першу композицию на власни текст („Чекал сом милу”) на „Червену ружу” послал 1972. року. По 2007. рок, кед на „Пупчу” виведзена остатня спомедзи його композицийох, найвецей компоновал на тексти шидского наставнїка у пензиї Василя Мудрого (9). Вкупно викомпоновал 15 композициї, од чого за три написал и тексти.
Славко Загорянски будзе поховани на ютре, 8. мая на 14 годзин на теметове у Шидзе.
Най му будзе вична памят!