РУСКИ КЕРЕСТУР – Дзецинске оддзелєнє амбуланти у Руским Керестуре, хтора дїлує у рамикох Дома здравя Кула, после длугшого часу ознова почало робиц.
Од стреди, 2. септембра, та надалєй, дзецинске оддзелєнє будзе робиц кажду стреду од 8 по 12 годзин. На оддзелєню робя специялизант педиятриї др Александра Варґа и медицинска шестра Тереза Бурчак.
Як визначела дохторка Варґова, родичи зоз дзецми у тот час годни присц нє лєм на препатрунок, алє и по потвердзеня и шицко друге цо им потребне. Вона додала же нароком вибрани таки фиксни термин, же би родичи нє мушели преверйовац чи дохтор роби а нєт потреби анї заказовац препатрунок, окрем кед будзе требац систематски препатрунки, о чим родичи буду благочасово обвисцени.
Най здогаднєме, по скорейших виявох директора Дома здравя Кула др Блаґоя Марковича за Рутенпрес, Дзецинске оддзелєнє амбуланти у Руским Керестуре требало почац робиц ище 1. юлия, медзитим пре роботи на поставяню нових ПВЦ дзверох и облакох, як и пре лєтни рочни одпочивки, дзецинске оддзелєнє керестурскей амбуланти урядово почало робиц стреду 2. септембра.
