ВЕРБАС – У центру Вербаса всоботу, 12. септембра, у орґанизациї Културно-уметнїцкого дружтва Сирмаи Кароль отримани Фестивал мадярскей кухнї и традициї Под платанами, осми по шоре.
По словох орґанизаторох, тота манифестация пошвецена очуваню ґастрономского и културного нашлїдства Мадярох, промоциї мадярских националних єдлох, и того року, зазберуюци числених учашнїкох и нащивительох, дала полне доприношенє розвою Вербасу и Войводини.
У парку у центру городу числени нащивителє того дня мали можлївосц уживац у смакох ґулашу, ланґошу, традицийних стародавних колачох, алє и тих сучаснєйших, як и у сладкей и сланей жимнїци и других специялитетох. На числених столїкох були виложени рижнородни ручни роботи и прикраски, а отримана и пригодна богата културна програма.
На тогорочним Фестивалу мадярскей кухнї и традициї Под платанами присутни були и предсидатель општини Вербас Милан Ґлушац, предсидатель Мадярского националного совиту Акош Хайверт, заменїк предсидателя општини Кула Кароль Валка и предсидатель Културного союзу войводянских Мадярох Арон Шутуш.
У програми наступели виводзацки ґрупи рижних мадярских културно-уметнїцких дружтвох зоз Вербасу, Србобрану, Бачкей Тополї, Кули и других городох, а орґанизаторе порихтали и числени змисти за наймладших нащивительох, рижни роботнї и бависка.
Предсидателька КУД Сирмаи Кароль Ливиа Боґанч Андрияшевич подзековала локалним, покраїнским и мадярским партнером на потримовки у орґанизациї манифестациї, окреме Мадярскому националному совиту.
