Пишта Горват народзени 1950. року у Раткове, a живот го 1973. року одведол до Нового Орахова. Раховал же придзе лєм на кратко, алє у Орахове жиє и нєшка. Оженєл ше зоз Рускиню, народзел ше им син, а маю и унуку. Цали свой живот бави фодбал, а кажда бешеда ше зведзе праве на тото – фодбалски стретнуца и шицко коло того.
Пишта Горват озбильнєйше почал бавиц кед мал 18 роки, за Телечку. Бавел на позициї правого кридла и бул барз швидки. У Суботицкей лиґи го познали по тим же могол барз моцно копнуц до лабди.
Кед ше врацел з войска, запошлєл ше у подприємстве хторе одкупйовало доган.
– Єдного дня, 1973. року, сом зоз двома фаховцами пошол до Нового Орахова же бизме препатрели пресади догану, а понеже то ишло прейґ землєдїлскей задруґи, тедишнї директор нас после роботи поволал до мотелу „Рона” хтори бул у власнїцтве истей задруґи. Вшелїяк, бешедовало ше и о фодбалу, та ме директор поволал же бим пришол бавиц до ФК „Славия”, перше на пробу, а кед буду задовольни и вони, и я, достанєм стаємну роботу, а же ше постараю и за змесценє – гвари нам собешеднїк и предлужує:
– Накадзи сом пришол до Орахова, уж ми нашли приватне змесценє у єдних людзох. Перше змаганє за Славию ми було у Бачкей Тополї. Було то пририхтуюце стретнуце процив екипи А.И.К, хтора ше у тот час змагала у Войводянскей лиґи. Славия страцела зоз 4:2, алє обидва ґоли за Ораховчанох дал я. По законченю стретнуца, тренер екипи зоз Бачкей Тополї ме поволал же бим прешол бавиц за нїх, медзитим, мал сом догварку зоз екипу Славиї. Там сом остал полни 15 роки. У Орахове сом ше и оженєл, людзе ме добре прилапели. Попри мадярского язика хтори ми бул мацерински, бешедовал сом и по сербски, а з часом сом научел и по руски. Достал сом стаємну роботу, а познєйше и квартель, хтори бул предвидзени за паноца, понеже теди у валалє нє бул стаємни паноцец – толкує нам собешеднїк.
Бавенє за екипу Славиї
Славия, кед Пишта почал бавиц за ню, змагала ше у Општинскей лиґи Бачка Тополя, а 1974. року руководство клуба направело план же би ше пласовала єден ступень висше, до Суботицкей лиґи. Тото ше им и поспишело 1976. року дзе бавели по 1988. рок.
– Кед зме ше пласовали до висшого ранґу, достали зме и даскельо помоцнєня, медзитим, векшина бавячох у екипи були Ораховчанє. То були златни днї ораховского фодбалу. Тренер бул Раде Ковачевич, родом з Нового Орахова, а потим екипу превжал Милан Вукмирович зоз Бачкей Тополї. Бавяче були дисциплиновани, поряднє ше тренирало, а атмосфера у клубу була барз добра. За 12 роки, кельо екипа Славиї бавела у Суботицкей лиґи, даскельо раз ше случело же зме перше место препущели другей екипи, понеже руководство було свидоме же гоч нам на шицки способи помагала землєдїлска задруґа, клуб нє годзен финансийно поднєсц змаганє у Войводянскей лиґи. Ми були задовольни, тиж и симпатизере клуба и патраче, а интересантне же булo вельо женски особи хтори були и найгласнєйши на стретнуцох – гварел нам Пишта.
Здогадованє на стретнуца, бавячох и Русин
За 15 роки активного бавеня у Новим Орахове, Пиштови вельо змаганя остали у паметаню.
– Патраче масовно приходзели на шицки стретнуца, було их и вецей як 300, провадзели нас и на госцованьох, а после кажди раз, без огляду на резултат, пред зоблєкальню нас чекала ладичка зоз пивом. Окреме сом любел бавиц турнири Руского слова, дзе зме госцовали по наших местох. Були то вше добри змаганя, а после одбавених змаганьох було друженє до позних годзинох, так же зме чекали кеди будзе шлїдуюци турнир. У паметаню ми остал турнир Руского слова хтори ше бавело у Дюрдьове, понеже зме теди були найлєпши, освоєли зме турнир и подзвигли погар – гвари Пишта.
Змаганя процив екипи Русина зоз Руского Керестура були окремни, понеже кажде стретнуце була приповедка за себе.
– Кед сом почал бавиц у Орахове, спочатку сом нє могол похопиц прецо ше тим стретнуцом дава окремна важносц, медзитим, зоз часом сом почал чувствовац цошка окремне кед ше бавело процив Керестурцох. Теди ше екипа Русина змагала у висшей лиґи и мали квалитетнєйшу екипу, но вшелїяк и ми, и вони, на стретнуцу жадали победзиц. Ми були у предносци, бо зме бавели опущено, а кед би ше страцело, страцели бизме од лєпшей екипи, док Керестурци бавели у якимшик корчу бо ше, у силним жаданю за побиду, часто случело же єдноставно страцели. Но, заш лєм, екипа Русина зазначела вецей побиди процив екипи Славиї, як ми процив нїх. На єдним турниру Руского слова у Новим Орахове процив екипи Русина сом аж дал евро-ґол, кед сом зоз „своєй позициї”, а то угел шеснац метерох, моцно копнул, а лабда закончела заглобена у горнїм правим куце – добре памета.
И далєй активни у фодбалу
Пишта Горват уж вецей роки у пензиї, алє ище вше рекреативно бави фодбал. На инициятиву дакедишнього ґолмана екипи Славиї, Тибора Лепа, хтори жиє у Байши, два раз до рока, у априлу и септембру, у Новим Орахове ше позбераю ветеранє хтори седемдзешатих и осемдзешатих рокох бавели за Славию. Тото друженє тирва уж вецей як двацец роки, дзе ше спочатку бавело на цалим терену, алє ше го кус-покус „скрацовало”. Тераз ше бави на малим терену, два раз по 15 минути, або кельо ше им сце. Нажаль, як Пишта гвари, вше их менєй єст у Орахове, остали лєм пейцме, а гевти зоз других местох, медзитим, дзечнє ше одволую и приходза на друженє.
И док „хлапци” бавя фодбал, „дзивчата” бавя кошарку. Нове Орахово седемдзешатих рокох мало женску кошаркашску екипу, хтора ше змагала у Другей войводянскей лиґи. На тот способ ше и жени позбераю, та и вони одбавя єдно змаганє. Потим шлїдзи и тото прецо ше зиходза, а то „треци полчас”, дзе ше друженє предлужує коло котлїка. Главни орґанизатор стретнуца уж спомнути Тибор, а до помоци вше ускочи и ловарске дружтво, фирма „Блаґофлор” зоз Бачкей Тополї, Спортске дружтво „Славия” и сами ветеранє.
Пишта Горват активни член у Месним здруженю пензионерох, а аматерски ше занїма и зоз голубарством. Док ше припатра на голуби, здогадує ше красних дньох кед цали валал „жил” за фодбал.
Просто до глави
Постої анеґдота о Пиштови цо ю паметаю старши любителє фодбалу хтори ше здогадую же „тренере процивнїцких екипох совитовали ґолманом же кед Пишта будзе биц пенал, най меркую же би их лабда нє вдерела. На єдним стретнуцу у Ловченцу ґолман стал на ґолу, а Пишта так копнул до лабди же го потрафела до глави. Исти ше преврацел, а лабда ше одбила аж по центер терена.