Поважно порихтани продукти з меса вершинского квалитету обовязна часц на каждим полним столє. Фалати найквалитетнєйшого меса нє охабяю ровнодушних анї найвибернєйших ґастрономох. Автентични смак и арома, порихтани по домашнїм рецепту з додатком природних присмачкох, характеризую продукти нашого собешеднїка котри ше занїма з преробком меса – Ивана Новака.
Кед ше врацел зоз Нового Саду дому до Коцура 2016. року, помали почал робиц услужни роботи и людзе ше почали интересовац за продукти котри им Иван понукал. Почал правиц колбаси и други продукти з меса, и так якош шицко и почало.
– Даскельо роки то так було, док сом нє пришол до єдного стадиюму кед сом ше запитал же чи би можебуц було добре шицко тото подзвигнуц на висши уровень, направиц дакус лєпши условия, реґистровац. Так ше трафело же сом дошол до проєктанта и гварел му же жадам дакус прешириц роботу. Вон ме посовитовал же би найлєпше було направиц обєкт и зробиц шицко так як тому шор, же би шицко було леґалне и же бим могол шлєбодно робиц. Нє роздумовал сом вельо, и одлучел же так и зробим – почина приповедку наш месар.
Иван направел обєкт, вибудовал будинок, и преважно сам робел. Приявел ветеринарскей инспекциї котра вишла на терен, а понеже шицко було так як треба, достал шицки потребни дозволи. Потим уведол и хасап стандард и вец почали и порядни контроли за продукти.
– Сцигол сом до декларацийох за продукти, та бим тераз уж и могол, а то ми и план, даґдзе до маркетох и предавальньох пласовац голєм даскельо файти салами и сухи колбаси. Шицко то, у сущносци, тирва 10 роки, и тераз сом углавним задовольни же дзе сом, у одношеню на тото як сом почал – щиро гвари Новак и предлужує – плани и амбициї маме, аж плануєме можебуц о рок, о два, мац и свой власни обєкт предаваня на мало, найвироятнєйше у Вербаше. Валал як валал, маме и конкуренцию, и шицко то у шоре, алє любели бизме ше прешириц на ширше тарґовище. Нє мож нїч прейґ ноци поробиц, алє на добрей зме драги, и задовольни зме як ше шицко одвива.
Припознаня и награди за продукти
Муштериї ма, а, як гвари, вше дахто нови придзе и приведзе дакого зоз собу, та ше то шицко помали крашнє розвива. Людзе препознаваю квалитет, а то Иванови барз мило, та ше того квалитету и трима.
– Маме припознаня и зоз рижних манифестацийох, як цо Колбасияда у Туриї дзе зме два раз завжали треце место, у Шиду зме з колбасу прешлого року завжали друге место, а на Новосадским сайме друге место зоз куленом. Того року зме на Новосадским польопривредним сайме завжали перше место зоз шункову саламу, и можеме повесц же нам то продукт у успишним розвою. Дай боже, най нарок приду и нови припознаня, понеже за тот рок таки и подобни манифестациї закончени. Нарок ше потрудзиме принєсц ище лєпши резултати – з ошмихом приповеда.
Новак у понукнуцу ма досц сухомеснати продукти – сухи сланїни, фалати меса (печеницу), фалати меса зоз шиї, фалати сухей шунки, колбаси и кулени, а рихта и закуски (мезе) за родзени днї и преслави, и то, як гвари, досц добре идзе. Вше попреда тото цо випродукує, гоч ше намага нє правиц вельки лаґер, углавним тоти продукти вше доступни на предай.
– Кед слово о рецепту, ми маме свой. Пробовал сом рижни и кулени, колбаси и инше, дацо сом „вжал” цо ше ми пачело зоз смакох, дацо „однял”, и дошол по даяки свой рецепт котрого ше тримам. Алє, на концу, то якиш стандард, правиме так як зме звикли правиц дома на валалє, праве домашнє, як я гварим – нє хаснуєме адитиви, и шицко по домашнїм рецепту. И людзе задовольни, углавним маю позитивни коментари, же им нашо продукти нє чежки за жалудок, и же нє спричинюю нєлагоди. Людзе вше препознаю квалитет – толкує наш собешеднїк и додава:
– И тота шункова салама наисце квалитетна, нє кладземе ляду, скорки, анї койдзеяки шпециї же би ше то отримало. Значи, то права домашня салама котра сто одсто з меса. Робели зме и анализу по котрей ма 21 одсто протеини, аж ше и людзе на Институту чудовали же як може салама мац тельо протеини. То нас дакус видвоює на тарґовищу, людзе препознали квалитет, та мож повесц же нам то продукт у розвою – задовольно толкує.
Широке понукнуце, а шицко домашнє
Шведочиме же нєшка нє так лєгко дойсц до правого, чистого и домашнього продукту з меса, а при тому цо Иван понука, людзе препознали квалитет и наисце то ценя.
– Маме и роштиль месо у понукнуцу, робиме и за два локални „роштильници”, подмирюєме их зоз роштиль месом, роштиль колбасами, швижо присмаченим месом у маринади, чевапами, плєскавицами, и ту зме нашли тарґовище. Маме од шицкого по дакус, та так крачаме напредок – бешедує Новак и додава – месо продукуєм сам, тримам прашачки, кармиме швинї и процедура така, понеже я нє мам реґистровану клальню, лєм преробок меса, та вец свойо швинї зоз ґаздовства ношим до клальнї, вони ми там поробя и потим тото врацам до преробку. На таки способ потвердзуєм уход сировини и по тим принципу функционує тото цо робим.
Иван ма свойо швинї, а кед му случайно потребне месо, а швинї ище мали, або нє досцигли потребну чежину, вец их бере од людзох з валалу котри преверени и кармя их так як цо их и вон карми, та може повесц же то домашнє. Зоз фармох швинї нє бере, а з месом ше дополнює лєм кед наисце ма потреби. Намага ше и ту звекшац продукцию, же би мал швинї през цали рок.
– Преважно робим сам кед слово о майстрованю, а кед дакус векша робота, вец анґажуєм роботнїкох. Ту и супруга Єлена кед ми потребна помоц, вона тиж приявена у фирми, и затераз то баржей фамелийна робота, а кед будзе потребне, запошлїме майстрох и вецей людзох. Затераз сцигуєме шицко поробиц, док ше ище дакус нє розвиє и нє прешири роботу. Можебуц уж и од яри придзе до пременкох, алє увидзиме.
Понеже маю три хладзальнї и продукция им цага досц струї, Иван роздумовал же би можебуц було добре уложиц до соларних панелох, же би зменшали трошки у старту и так мали вецей простору укладац до роботи и до нових машинох.
– Опремени зме зоз шицким цо нам треба, алє робота сама по себе вимага же би ше укладало и до машинох, алату, же би ше лєпше и швидше робело. За тот наш капацитет, цалком зме порихтани и опремени зоз досц солидну опрему, за нашо потреби то одличне. Як ше буду потреби у наиходзацим периоду меняц и звекшовац, так будземе робиц и на тим же бизме брали нове, лєпше и векше. Од укладаньох нє сцекаме, укладац ше муши нєпреривно, а трудзим ше и патрим вше же би ше од пенєжу котри ше заробело, голєм часц уложело до напредованя. На тот способ ше и розвиваме – заключел Новак.
Иваново понукнуце можеце видзиц на Инстаґрам боку Prerada mesa IN, ту можеце зоз нїм и контактовац кед надумаце покоштовац дацо зоз його продуктох, а то вам и ми, котри зме мали нагоду то зробиц, щиро препоручуєме.
