Цепли днї и приємни ноци чекаме цали рок, а лєто вше приноши зоз собу якуш носталґию на дзецинство. Кажде го дожиє на свой способ, алє скоро шицким наймилши праве тоти памятки хтори здобуваме през лєтни период – путованя, спортски турнири, лєбо лєм заслужени одпочивок.
Цикаве тото же лєто рочна часц хтора найчастейше при людзох будзи найвецей позитивни чувства. Психолоґи толкую же вецей слунковей шветлосци вплївує на нашо розположенє, та маме вецей енерґиї. Можебуц праве прето лєто велїм найоблюбенша часц рока, час кед лєгчейше правиме нови познанства, пробуєме дацо нове и здобуваме памятки хтори оставаю и длуго после остатнїх цеплих дньох.
Замодлєли зме даскельо младих же би зоз нами подзелєли цо за нїх лєто и прецо ше му каждого року ознова радую, та так настали тоти нашо „лєтни записи”.
Андрея: Мнє лєто час кед можем пущиц „розум на пашу” и забуц на шицки бриґи хтори ноши „швет одроснутих”. Лєто би нє було исте кед бим го нє препровадзовала дома, шедзела под терасу зоз шестру, а вона ме нагваряла най ше идземе превожиц гоч вонка було 40 ступнї. Тиж так, приємни лєтни вечари препровадзуєм з товаришками, у шпацираню, идземе до кафичу, лєбо на турнир. Влєце вше даґдзе одпутуєме, углавним на морйо, дзе цалком иншаки воздух, и там здобуваме нови памятки на хтори ше вше любим здогаднуц кед ше лєто закончи.
Иґор: Гоч сом нє бул кажде лєто у Керестуре, праве тоти лєта ми и наймилши. Лєто час кед „полнїм батериї”. Лєто ми приноши чувство же мам вецей часу, хтори найволїм препровадзиц зоз милима особами. Цепли ноци, односно лєто ме асоцирує на турнири у фодбалу и кошарки, и нє могол бим го задумац без доброго змаганя и навияня. А кед днї найцеплєйши, нє можем их задумац без клими.
Аня: Кратки путованя, одход на морйо, слункованє и уживанє – то найлєпша часц лєта. Найвецей шлєбодного часу мам през лєто, а найволїм го препровадзиц зоз дружтвом. Любиме ше купац на базену, правиц роштиль, або пойсц на даяку добру журку, а того року пойдземе и на даскельо путованя. През лєто ше намагам заробиц и свой пенєж, та предавам ґереґи, а зоз своїма пайташками сом почала и чувац дзеци на родзених дньох. Жадам тото лєто препровадзиц найлєпше цо можем, бо нарок закончим штредню школу и чека ме нови початок.
Иван: Кажде лєто ми почина зоз „Ружу” и пририхтованьом за ню, и думам же то найлєпши способ як воно може почац. Вше чекам лєто и конєц школского року, поготов одкеди сом у школярским доме и дома сом лєм през викенд, а то ми нє досц часу за друженє и шицки други обовязки. Намагам ше максимално вихасновац шлєбодни днї – робим, ходзим на проби, участвуєм у рижних акцийох, бавим на турнирох и дружим ше, а найволїм пойсц на базен окупац ше.
Уна: Найволїм лєтни рана, кед ище нє барз цепло, нїґдзе ше нє понагля и нїч ме нє чека, кед сом ище нє виплановала як ми дзень будзе випатрац, алє знам же дацо здумам. Любим кед спонтано виплануєме одход на базен, вожиц ше на ролерох, лєбо гоч лєм шедзиц на тераси коло даякей добрей музики и бешедовац. Лєто ме асоцирує на власи хтори слани од морскей води, лєтни сукнї, кусанє слунечнїку и друженє, без провадзеня кельо годзин на годзинки. Нє могла бим лєто задумац без жимней кафи, коли зиро, купацого костиму и без пробох.
Даниєл: Вельки горучави, чувство шлєбоди же нєт вецей школи и кед кажди дзень приноши дацо нове – то ми перши здогаднїки на лєто. Як и шицки, влєце любим пойсц на базен, турнири и дружиц ше до позних годзинох зоз товаришами. Лєто и час кед ходзим на найвецей родзени днї, та вше єст даяка причина за друженє и добру журку. Гоч лєто нам, младим, час за одпочивок, намагам ше робиц и помагац родичом тельо кельo можем. Нє любим лєм суньоґи, алє и попри нїх, влєце здобувам найвецей красни памятки.
Гоч кажде зоз нас лєто доживює на свой способ, дакому наймилши памятки зоз друженьох, дакому зоз спортских турнирох, базену, путованьох, а дакому мирни хвильки кед ше одпочива, алє шицким нам заєднїцке тото же ше влєце чувствуєме шлєбодно, же маме вецей часу за людзох хторих любиме и нагоду здобуц памятки хтори будземе длуго паметац. Можебуц ше нашо дожица розликую, алє нас здогадую же щесце часто творя мали ствари: сладоляд кед нам горуцо, длуги вечарши шпацираня, шмих зоз милима людзми, спортски терени, пах моря и час препровадзени зоз фамелию.
Наздаваме ше же вас тоти записи здогадню на вашо наймилши лєтни памятки, та и же вас буду мотивовац же бисце направели свойо нови, хтори будзеце зоз ошмихом преприповедовац.
Же бизме вам помогли, пририхтали зме вам и лїстину стварох хтори можеце поробиц през лєто, а же би вам воно остало у окреме милим здогадованю.
Задатки за тото лєто:
☐ Ноцнє купанє
☐ Патриц виход Слунка
☐ Караоке вечар
☐ Пикник
☐ Спа дзень
☐ Вечар дружтвених бавискох
☐ Журка
☐ Направиц роштиль
☐ Пречитац голєм єдну кнїжку
☐ Патриц филм на отвореним
☐ Направиц здрави сладоляд
☐ Єдно пополаднє без екранох.