Цалком случайно, дзешка шейдзешатих рокох, случело ше же и у Кули, и у Вербаше, були двоме коминяре, а з истим меном – Владо Канюх. Наш собешеднїк, син Владу Канюха зоз Кули, гвари же пре тот интересантни факт запаметал велї шмишни ситуациї, бо теди кажде познал коминяра, а дзе же ище двох, а з истим меном.
Но, рушме од початку. Дюра Канюх походзи зоз Керестура, алє ше його фамелия нєодлуга одселєла до Кули, дзе му оцец робел як коминяр. Понеже бул приватнїк, а тримал пол Кули, у нїх бивали велї шеґерти, та и сам Дюра, док роснул коло нїх, скоро шицких познал цо сцели виучиц за коминяра у його оца. У тедишнї час майстрове себе сами правели щетки за роботу, алє Дюров оцец мал машинку, та коминяре зоз цалей општини ходзели до нїх справиц цо им требало за роботу, та аж и заняти у кулским „Комуналцу”. Док ище нє було машини за щетки на струю, за тоту роботу требали троме – єден обрацал, други водзел, а треци зацаговал дрот. Троме за єдну щетку.
Дюра ше вишколовал за маляра и фарбара, а у тей истей школи ше учело и за коминяра. А понеже од оца научел тоту роботу, хибел му лєм печац же би бул и закончени коминяр. Но, то нє завадзало, бо оцови требала помоц, та помали и вон вошол до того ремесла. Перше касирал, виписовал блок-рахунки за кажде обисце кельо ма плациц. Теди ше и уписовало до кнїжки же коминяр бул препатриц комин. То було обовязне.
– Паметам яки оцец приходзел чарни з роботи. А и я. Дакеди нє було купатила, та зме ше умивали у вельким лаворе. Теди ше шицки комини чисцело, и по обисцох, и по фабрикох. Кед зме робели, поведзме, у цегляри, дзе вельки комини, та боме требало мерковац. Тоти коминяре цо були дакус моцнєйши и нє могли войсц до комина, та зоз собу мали помоцнїкох цо ше даяк ухпали – бешедує искуства зоз младих дньох.
Робота коминяра нє лєгка, а окреме нє чиста робота. Дюра нам приповеда, а указує и на фотоґрафиї, як ше коминяре дакеди облєкали. Чарни панталони и рекла, чарна шапка, алє и била партикла цо ше ю закруцало прейґ устох и носа же би ше нє удиховало садзу. Коло шиї мал преруцену длугоку щетку и торбичку за рахунки.
Драга го одведла до Нємецкей
После штреднєй школи Дюра робел у Вербаше, а нєодлуга людзе почали одходзиц робиц до Нємецкей. Кед ше пошол розпитац на биро хторих майстрох ше глєда, упознал жену Рускиню цо там робела. Було єй мено Левона. Лєгко ше далєй згварели. Порадзела го же би ше приявел як металєц, бо им у Нємецкей малярох и фарбарох нє требало. Вон ше дакус двоєл, бо о роботи з металом нє знал нїч. Но, кед пошол на розгварку за роботу, на ґалєр заквачел Истрову значку и гварел же там робел. Правда, як маляр, алє з оглядом на тото же му мац там була занята, Дюра добре знал цо ше у тей фабрики робело з металом. Комисиї гварел же там паковал, бо раховал же будзе знац запаковац, гоч цо му даю до рук. Праве таки им и требал, и од двацец заинтересованих вон бул перши од седмерих вибраних цо пошли робиц до Нємецкей, як пакер до фабрики Мерцедес. Вони правели шицко цо хромиране на мерцедесовей превозки – знаки, клянки и други метални часци. Потим прешол за маляра, алє нє було стално роботи, та нашол роботу у Хартман Браун фарбики цо продукує електронски апарати и там робел як ґалванизер. У Нємецкей остал робиц дзешец роки.
Зоз супругу Наталию ше побрали 2. мая 1972. року, та кед ше вон вибрал до швета, и вона пошла з нїм. Робела дзевец роки у Нємецкей, уж пришло и перше дзецко, та ше о нїм старали и єдна баба, и друга баба. Млада Канюхова фамелия у медзичаше купела порту у Ветернику и почали себе будовац хижу. Робота ишла, хижа була закончена, та кед ше народзело друге дзивчатко, Наталия пререзала:
– Идземе ми дому!
Наталия почала робиц на Институту у Сримскей Каменїци и випадло же ту мала векшу плацу як у Нємецкей. Ту остала по пензию, робела полни 26 роки. Дюра ше запошлєл у Ниту, а вец у Дому за особи з почежкосцами у розвою у Ветернику на отримованю, одкаль пошол до пензиї 1994. року пре здравствени причини.
Дзеци були мали, хорота го знашла, пензия мала, а инфлация шицко пред собу лїґала. Кед ше Дюра дакус окрипел после инфарктох цо их виволало куренє, у шлєбодним чаше зоз цимбором робел як маляр, кеди кельо могол и кельо их волали. Тих рокох, у тей кризи, лапел ше и до щеткох. Ша, оцец го научел, а вон нїґда нє забул як ю треба направиц. Щетка по щетка, рок по рок, та уж их, ниа, прави двацец роки. На єден способ, щетка их и виратовала.
Мигель Канюховим крашнє ушорени. Шицко стої на своїм месце. Єдни дроти кружно покруцени, на полїчкох поскладани поштригани на одредзени велькосци, почитани дроцики за єдну щетку повязани стоя на громадкох. У машини шицко поставене и Дюра указує як треба правилно направиц щетку – поставя до сцискача скруцену сайлу цо будзе ручка за щетку, склада громадки дротох єдну коло другей, зацагує, круци, обраца и на концу одштригує дроцики цо стирчали. Випатра лєгко, як и кажда робота цо ю робиш роками, як це оцец научел.
Вєдно зоз супругу ходза по вашарох по околних местох – до Руми, Дебелячи, Жабелю, Темерину, Шиду, та предаваю тим цо ище топя до пецох. Гоч уж єст вше вецей обисца цо маю уведзени ґаз, окреме на валалох, щетки ище як потребни.
Дзивки их обиходза, хтора кеди може. Старша дзивка Таня ше одала до Керестура, та частейше зайдзе, а младша Наташа тераз зоз фамелию жиє у Канади, та ше часто дописую прейґ интернету. Гваря, барз ше цеша и у дзецох и унучатох, бо кажде пренашол свою драгу.
Уж є два мандати у Церковним одборе
Дюра у Церковним одборе новосадскей парохиї святих апостолох Петра и Павла уж дзешец роки. Рахує, уж ше му закончел други мандат, а и то швидко прешло. Трудзел ше помогнуц кельо могол, а вшелїяк же зоз своїма майсторскима схопносцами помагал и у церкви, и на парохиї. Гвари, бул младши, та нєт цо там нє пребилєл, вшелїяк и з другима одборнїками.
Нєшка у Церковним одборе єст дванац членох од котрих два жени. Вєдно ше намагаю участвовац у роботи Церковного одбору, помагаю парохови, цо окреме важне кед приходзи на парохию нови паноцец, алє вшелїяк и кед приходзи владика. Одборнїки дзечнє зоз власнима руками и знаньом доприноша нашей церкви. Гоч их нєт вельо, алє вше су ту кед треба. Ище би лєм любел же би ше и младши людзе уключели до роботи Церковного одбора, заключує Дюра.
Чи коминяр приноши щесце
Скорей ше гуторело же кед видзиш коминяра значи же будзеш мац щесца, лєбо же ше треба лапиц за ґомбичку, лєбо му витаргнуц дроцик зоз щетки кед нє патри. Алє, чи то наисце правда, Дюра нє знал одвитовац. Лєм ше гунцутски ошмихнул.
