Музика медзи младима Руснацами нїґда нє була цошка нєпознате. Старши ґенерациї паметаю леґендарни ґитарияди, бенди Ореоли, Маринер, Армитон, Алеу, Тхе Смарґельс… Потим пришла новша ґенерация – Crazy cousins, як и даскелї кантавторе, Pishta, Михаил Рамач, Реепгун, Саша Палєнкаш, алє якош од 2015. року як кед би ше музична сцена при младих Русанцох дакус „успала”.
Медзитим, у 2026. року, точнєйше на „Водова фесту” могло обачиц нє лєм же ше виводзи шпиванки по руски, алє и же ше будзи музична сцена при младих.
То нас мотивовало же бизме бенди хтори тераз активни у нашей заєднїци (а велї з нїх наступели и на „Водовей”) ту, у Мозаїку, позберали на єдно место и опитали ше им як настали, як предлужели грац и яки им упечатки после даскелїх наступох хтори мали.
У шлїдуюцих шорикох сце годни пречитац же члени бенда маю вельо дзеки, мотивовани су, алє и дознац зоз якима проблемами ше зочую, односно, яки маю потреби же би ше тота сцена и далєй розвивала.
„Women power”
Дзивчата ше спонтано зишли у Доме култури же би грали на рижних инструментох и так настал бенд „Women power”. Од того першого стретнуца було ясне же медзи нїма постої добра енерґия, та одлучели мац проби и надалєй. Нєшка тот бенд творя Емилия Мудри – ґитара, Адела Мецек – бас ґитара и вокал, Михаела Брекайло – буґни и вокал, Кира Пап – вокал и клавир, Кристина Русковски – клавир и вокал, и Хана Будински – вокал. Їх репертоар наисце рижнородни – граю од панку, по народни шпиванки, домашнї и странски гити. Першираз наступели на Осмомарцовским концерту у Дзешатки и то на нїх зохабело вельки упечаток. Окреме им останє у паметаню наступ на фестивалу „Водова фест” и, як визначую, то им найвекши успих потераз. Гоч приходза зоз малого штредку, веря же их то нє огранїчує, алє мотивує же би ишли напредок. У будучносци би любели мац лєпши условия за роботу, насампредз простор дзе би була опрема хтора им потребна за бенд и наздаваю ше же єдного дня пред публику виведу и авторски писнї. Младим музичаром поручую же би були упарти, же би пренашли людзох/товаришох зоз хторима дзеля исту страсц и же би вихасновали кажду нагоду за наступ и най здобую искуства.
„Short notice”
То бенд хтори тиж настал цалком спонтано кед ше члени зишли и бешедовали о музики, граню и шпиваню, та почали и предкладаня за проби. Бенд творя Борис Барна – гармоника, Жарко Остоїч – бас ґитара, Алексей Надь – буґни, Марина Роман – ґитара и вокал, и Мирослав Малацко – вокал. Граю и шпиваю рок, поп и забавну музику, на руским, сербским и анґлийским язику. Члени репертоар правя вєдно, вибераю писнї хтори любя и праве прето є розлични и енерґични. Першираз наступели на „Дньовки” 2024. року, а окремна хвилька за членох бенда була на „Водовей”, дзе мали перши векши наступ. З оглядом на тото же наступели на „Водовей” пред домашню публику, барз уживали. Любов ґу музики, упартосц и медзисобна потримовка найважнєйши за роснуце. У будучносци би сцели предлужиц робиц и сотрудзовац, и жадаю купиц голєм основну опрему за проби. Младим хтори сцу основац бенд поручую же кед буду мац таку нагоду, нє треба най ю препуща. Кажде хто люби и ужива у музики, треба най то и укаже и виполнї себе зоз музику хтору люби и зоз друженьом. Бенд права нагода за таке.
„Мацерово мушкатли”
Приповедка бенду „Мацерово мушкатли” почала ище пред дзешец роками, на кампу у Делиблатскей писковини и одтеди Жаре, Павле и Мижо граю вєдно, меняюци вецей шпивачох и жанри. Терашнї состав творя Жарко Остоїч – ритем и соло ґитара, Павле Рац – бас ґитара, Матей Шепински – вокал, Михаїл Римар – буґни и Душан Шинка – помоцна бас ґитара. На початку грали поп-рок, алє з часом прешли на моцнєйши панк и рок звук. Перши наступ мали на Акустики Рутеники у РКЦ-у у Новим Садзе, а познєйше наступели на фестивалох як цо то „Дньовка” и „Водова фест”. Як гварели през франту, мали щесца же Матей поламал руку пред „Водову”, бо нє робел, та мал часу за проби и могол ше присподобйовац ґу другим. Вони троме робя у Керестуре, Новим Садзе и Беоґрадзе, та мали дакус почежкосци коло орґанизованя пробох, алє на концу уживали у пробох хтори тирвали и по 3, 4 годзини. За тераз граю обробки познатих писньох и ище вше нє маю авторски, алє сцу напредовац крочай по крочай. Окреме им мили наступ на тогорочней „Водовей”, дзе почувствовали позитивну енерґию публики и видзели же вона уживала у їх виводзеню. Їх порученє младим єдноставне, алє поучне: „Уживайце, грайце и вежбайце – и поєдинєчно, и як ґрупа”. Бенд може напредовац лєм кед кажди член вежба дома и кед придзе порихтани на пробу. На концу сцу подзековац шицким орґанизатором же им оможлївели наступиц на „Водовей”, а тиж так и керестурскому Каритасу хтори им уступел просториї за вежбанє и публики хтора их пришла потримац. Тиж, жадаю ше пребачиц и шицким сушедом хтори слухали як граю на пробох до позних годзинох.
П. С. Sorry, будземе и надалєй.
Пестуйце Мацерово мушкатли!
Ди-джей Алеко
Алексейови Надьови зоз Керестура музика була важна ище у основней школи, а идея же би бул ди-джей нє настала прейґ ноци. Инспирация му бул Avicii, пре хторого и полюбел електронску музику. Опрему за ди-джея купел ище 2023. року, медзитим, понеже бул у Америки, мал обовязки на факултету, а познєйше и робел, нє поспишело ше му порихтац так добре же би наступел даґдзе. Потим го пайташе зоз „Пакту” „поґурали”, вон ше одшмелєл, та першираз наступел на „Водовей”. На „Водовей” сцел пущац тоту музику цо люби, у хторей ужива, та ше одлучел за house и странску dance, а пущанє такей файти музики му примарни циль и надалєй. Алексей толкує же кед дахто ди-джей у мали штредку, предносц тото же их у Керестуре єст мало, а нєдостаток тото же ше чежше “преґурац” на векшу сцену. Тиж проблем же у Керестуре Омладински дом/диско нє роби, а то би бул одлични простор за проби бендох и ди-джейох. Ище вше нє зна дзе би любел наступиц у будучносци, гвари же му шицко єдно, покля ужива у музики хтору пуща. Младим поручує же би нє одустали од своїх снох и жаданьох. Гвари же и йому требало досцчасу же би ше одшмелєл наступиц, алє чувство после першого наступу нє мож описац. Кажде хто сце буц ди-джей, треба же би ше у тим опробовал.
„Касиус бенд” (ig: cassius.band)
Трох младих музичарох – Иґора Папуґу, Стефана Колошняя и Ивана Планчака, злучела любов ґу музики и оркестер Дома култури у хторим грали. На їх репертоару руски и сербски народни писнї, зоз хторима сцу очувац традицию и приблїжиц ю ґу публики. Перши наступ мали 2023. року на „Ружи”, дзе им до помоци пришол Борис Жирош на бас ґитари, а од теди наступаю на розличних преславох и случованьох. Гоч на початку нє мали квалитетну опрему и чежко им було орґанизовац проби пре приватни обовязки, наглашую же упартосц и робота ключ їх напредованя. Найбаржей уживаю кед граю на свадзбох, балох и подобних вешельох, алє кажди наступ доживюю як нову нагоду же би публики дали шицко од себе. У будучносци би сцели и далєй наступац у Руским Керестуре и у других руских местох, а можебуц єдного дня направя и авторску музику. Младим поручую же би були шмели, упарти и же би ше нє бали витвориц свойо идеї.
Фотоґрафиї: Я. Винаї и И. Медєши