ВЕРБАС – У просторийох Културно-просвитного дружтва „Карпати” на соботу, 26. септембра, будзе традицийна манифестация Фестивал хорского шпиваня, котра того року будзе отримана по шеснасти раз.
На Хорским фестивалу наступя домашнї Хор КПД „Карпати” з Вербасу, Церковни хор Грекокатолїцкей церкви Успения Пресвятей Богородици зоз Коцура, як и шпиваче зоз Руского културного центру з Нового Саду, з КПД „Дюра Киш” зоз Шиду, Дому култури Руски Керестур, а публики ше представи и Дружтво Руснацох зоз Суботици.
Манифестацию потримали Национални совит рускей националней меншини, Покраїнски секретарият за културу, явне информованє и одношеня з вирскима заєднїцами и Покраїнски секретарият за образованє, предписаня, управу и национални меншини – национални заєднїци, Завод за културу войводянских Руснацох и Општина Вербас.
Фестивал хорского шпиваня почнє на 18 годзин у просторийох Дружтва у Вербаше.