Концом прешлого року, кед бул час почац пририхтовац ше за нову лєтну сезону, у Дюрдьове отворени нови простор у котрим мож вежбац на иновативни, а Дюрдьовчанком, указало ше, на барз интересантни, алє и интензивни способ. Power plate справи на котрих ше вежба и котри ше под час вежбох трешу. Вони помагаю же би ше схудло, достало мускули и зняло целулит.
Пред пол рока, у Дюрдьове отворени нови простор за вежбанє. Почало ше вежбац на power plate справох за фитнес и регабилитацию, котри хасную технолоґию тродимензионалних вибрацийох. Тоту иновацию до валалу уведла витирвала и упарта у своєй одлуки таке пробовац, поднїмателька Славица Проле зоз Ґосподїнцох. Гоч Славица закончела штредню економску школу, одмалючка знала же люби спорт и же єй вон вше будзе часц живота, алє и животна поволанка.
– Од шицких спортох котри сом тренирала, найволєла сом латино-америцки танєц. У тим танцу робя шицки мускули, та ше ми прето пачело ходзиц на ньго. На пoвeр плeйт (power plate) справи сом почала тренирац 2011. року, и дзивка котра нас тренирала обачела же ми добре идзе, та сом, кус по кус, после законченого курсу и обуки почала з ню тренирац жени на тей справи. Потим сом направела кус длугшу паузу, бо сом була два раз ваготна, и чекала сом най дзеци вирошню. Вец сом сцела постац самостойна, та сом одлучела же будзем сама тримац тренинґи. Мала сом искуствиє и знанє, алє требало уложиц до опреми и найсц добри простор. Нє бала сом ше же ше ми то нє поспиши, знала сом же жадам почац робиц на тим и то ми було досц. Знала сом же то тото праве, цо треба най робим и цо жадам робиц – гварела Славица Проле зоз Ґосподїнцох, тренер на power plate справи, котра одмалючка тренирала рукомет, карате и латино-америцки танєц, односно длужей як дзешец роки.
Power plate справа то платформа на котрей ше стої док ше вежба, котра прави контроловани вибрациї и так стимулує мускули же би ше активовали под час вежбаня. На Power plate справи ше порушує векше число мускулох, та тренинґ постава ефикаснєйши, понеже ше активую и ґрупи мускулох котри ше нє можу активовац без такей вибрациї, або зоз класичним вежбаньом.
Дюрдьов бул найвигоднєйши
Славицу, кед почала тренирац, а тиж и жени котри при нєй тренираю, найвецей прицагнул факт же ше вежба лєм пол годзини.
– Жени углавним нє маю часу, та ше интензивнєйше вежбанє котре тирва пол годзини указало практичне нє лєм пре форму цела, алє и пре час котри жени муша видвоїц за вежбанє. Тоти пол годзини по квалитету меняю годзину, годзину и пол вежбаня у терховнї, або на аеробику – гварела Славица и додала же кед одлучела же сце самостойно почац робиц, роздумовала котре место у блїзкосци Ґосподїнцох найвигоднєйше за початок тей роботи. Темерин нє бул вигодни, понеже у нїм уж було досц орґанизовани вежбаня и простори за вежбанє за жени, а Дюрдьов єй бул интересантнєйши од Жаблю, гоч є менши, алє валали коло нього досц занєдзбани, кед слово о вежбох за жени. У Дюрдьове ше єй пачели два простори на главней драги, а тот за котри ше одлучела бул векши. Як гвари, нє погришела. Пошвидко як обявела на дружтвених мрежох же почина робиц, за вежбанє ше приявели седемдзешат жени зоз Дюрдьова, Жаблю, Шайкашу, Ковилю и Мошорину. Число женох ше нє зменшує.
– Спочатку сом робела сама, бо сом ше сцела упознац зоз женами котри почали вежбац и видзиц чи шицко добре функционує. Потим сом запошлєла и дзивку. У першей змени я вежбам зоз женами, а у другей вона. Жени знаю же ми важне най вони буду задовольни зоз вежбами, и зоз приємним амбиєнтом. Прето найволїм щиру бешеду котра будзе шицким на хасен, а мам єден циль – най буду задовольни обидва боки – гварела Славица.
Вежби ше заказує на апликациї
Славица од початку знала же нє жада правиц вельки ґрупи, понеже ше жадала пошвециц каждей жени окреме док вежба.
– Кажда особа приповедка за себе, та так жадам же би кажда жена була задовольна зоз посцигнутим резултатом. Шицки жени вежбаю вєдно, нє шицки су истих рокох, та их прето надпатраме, указуєме им, виправяме их, алє им и суґеруєме поєдинєчно на котри ґрупи мускулох най обраца вецей уваги – потолковала Славица.
Славица перше купела два справи за вежбанє, а потим докупела ище три. На каждим тренинґу єст пейц жени котри вежбаю зоз кулями, пантлїку на розцагованє и зоз лабду за пилатес. Кажди дзень ше вежба одредзену часц цела. Тото цо тиж иновативне и барз практичне, то же себе жени сами заказую тренинґи на апликациї. На нєй пише котру ґрупу мускулох ше роби кажди дзень, та себе мож плановац так як жадаце. На кажди пол годзини вежба нова ґрупа женох. Вежбац мож од осем рано, по осем вечар. Кед заказани тренинґ одкажеце дванац годзини пред тим, нє препаднє вам тот термин, та го можеце заказац ознова. Жени котри маю устаємнєни розпорядок углавним закажу шицки тренинґи напредок, а даєдни заш, дзень пред тим.
– Вежби обдумани напредок за кажди дзень. Робиме по три сериї, и маме два кратши паузи. Важне ше пред тренинґом „зограц”. За вежбанє найважнєйша дзека, понеже тот хто сце, тот и може. Важне робиц правилно, а кед єст даяки проблем, можеме кориґовац, або прилагодзиц вежби. Вше сом за пораду. Перши тренинґ ше нє наплацує, вон пробни, и мож видзиц чи вам ше пачи. Мож хасновац пакет дзешец, дванац, шеснац и двацец вежби – гварела Славица, котра тренира зоз женами котри сцу схуднуц, алє и трима персонални тренинґи женом котри жадаю затиц, односно достац мускули.
Тренер Славица гвари же вежбанє барз значнє за здраве цело и здрави дух. Мускулова маса важна за добре функционованє цалого цела, та прето треба водзиц рахунку и вежбац, або ше голєм шейтац, пиц досц чечносци, єсц поряднє и квалитетну поживу. Дзеци одмалючка треба учиц же важне тренирац, водзиц их на даєден спорт, як цо и вона свойо двойо дзеци учи. Вецей о вежбаню на power plate справи при Славици Проле зоз Ґосподїнцох мож опатриц на єй Инстаґрам профилу Fit_by_S_studio.
