КОЦУР – У рамикох кампанї Контрола у твоїх рукох – прето же вше даваш шицко од себе котру того року вєдно запровадзую Здруженє за потримовку женом Героини и бренд Персил, з потримовку Општини Вербас, внєдзелю, 13. септембра отримани безплатни превентивни ултразвучни препатрунки першох у Коцуре. Иста акция пред тим запровадзена у Змаєве и Савиним Селу.
По словох компетентних зоз Здруженя Героини, зазначене добре одволанє и у запровадзеней акциї препатрени 138 жени. Найвецей жени ше приявели у Коцуре, та безплатни препатрунок окончели 58 жени з того валалу.
И з тей нагоди орґанизаторе визначели значносц превенциї и бриґи о здравю, як и значносц порядних контролох и розвиваня звикнуца превентивних препатрункох котри найлєпши способ же би ше евентуални пременки видзели начас. Благочасова дияґноза у велькей мири доприноши успишнєйшому лїченю – було порученє котре провадзело отриману акцию.
