РУСКИ КЕРЕСТУР – У просторийох Рускей матки у Руским Керестуре, всоботу 5. септембра, отримана схадзка Управного одбору Рускей матки и єй Одбору за културу.
Схадзку водзел предсидатель Рускей матки др. Михайло Фейса, а на Дньовим шоре було вкупно 7 точки. По прилапйованю записнїка зоз прешлей схадзки, хтора отримана 4. априла, соботова схадзка почала зоз пораду о отримованю тогорочней Подобовей колониї „Еуфемия Гарди”, та одлучене же 8. Подобова колония будзе отримана на соботу, 19. септембра.
Кед слово о видавательней дїялносци Рускей матки, на схадзки начално догварене и орґанизованє промоциї новей кнїжки Михайла Катони под назву „На преходзе до терашньосци – написи, информациї, писма, бешеди”, хтора би требала буц отримана 26. септембра у просторийох Месней заєднїци на 18 годзин. На схадзки спомнута и идея же би ше источашнє отримало и промоцию антолоґиї поезиї „Дуга над валалом/Дуга над селом 2”, хтора за тераз промовована лєм у Коцуре.
На схадзки тиж було слова о формованю делеґациї за одход на схадзку Шветовей ради Русинох/Руснацох/Лемкох до Старих Янковцох, як и на Културну манифестацию „Кед голубица лєцела” до Петровцох и Старих Янковцох першого викенду у октобру.
Бешедоване и о формованю лїстини Рускей матки за виберанки за нове зволанє Националного совиту Руснацох. Начално порадзене же Руска матка, як и на прешлих виберанкох, будзе мац свою лїстину зоз кандидатами, а Фейса визначел же обчекує исти, або аж и лєпши успих як на прешлих виберанкох, понеже у тим мандату НСР Руска матка мала трох членох.
Предсидатель Рускей матки тиж поинформовал членох же по конкурсу Министерства информованя и телекомуникацийох достати по 600 тисячи динари за Радио Руски Керестур и Руски интернет портал. Як гварел Фейса, у плану купованє опреми за радио як и знїманє документарного филма з нагоди 35 рокох Рускей матки, у сотруднїцтве зоз кулску Ку-медию.
