НОВИ САД – На соботу, 5. септембра специялистична служба Дома здравя Нови Сад орґанизує превентивни препатрунки дзецох и младих школского возросту у амбуланти Лиман.
Дзеци буду препатрац офталмолоґове, физиятри и оториноларинґолоґове специялисти у амбуланти Лиман у термину од 1 до 14 годзин.
Заинтересовани можу свой термин заказац на число телефона 021 4879 848 ище наютре, пияток, 4. септембра од 8 до 12 годзин. Препатрунки ше нє будзе наплацовац, а акция планована з цильом же би ше благочасово одкрило и лїчело поремеценя функциї виду, локомоторного апарату и слуха при дзецох. Кед ше обачи здравствени проблем, препоручи ше на дальше лїченє ґу компетентному специялистови.