РУСКИ КЕРЕСТУР – У Дзецинскей заградки Цицибан, од септембра почали ходзиц ище 30 дзеци. Тиж, нови роботни рок почал зоз формованима шейсцома ґрупами, до хторих розпоредзени 152 дзеци.
У одношеню на влонї, кед було 7 воспитни ґрупи, тот роботни рок почал зоз єдну ґрупу менєй, точнєйшє без пополадньовей воспитней ґрупи. Тераз, обєкт творя два яшельково ґрупи, младша, штредня, старша воспитна ґрупа и пририхтуюца предшколска ґрупа, у хторих воспитно-образовну роботу реализую 11 воспитачки.
Число дзецох хтори конкуровали до оводи менше у одношеню на прешли рок, алє без огляду на тото, ґрупи пополнєти и єст лїстина чеканя, гварела воспитачка Наташа Варґа, визначуюци же на чеканю остали дзеци яшелькового и младшого возросту.
Кед слово о планох за тот рок, воспитачка Наташа Варґова визначела же ше заняти у Дзецинскей заградки предлужа намагац оможлївиц дзецом шлєбоду виглєдовац, виражовац свойо идеї и учиц през бависко.
Зоз родичами приоритет будзе розвивац добри одношеня през їх активне уключованє до живота Дзецинскей заградки, а ту и отримованє доброго сотруднїцтва зоз керестурску школу, як и зоз локалну заєднїцу, през рижни проєкти, културни манифестациї и заєднїцки активносци.
