Гоч того року ламачка кукурици почала скорей як прешлих рокох, потераз тота значна робота у хотарох у шидскей општини ище нє цалком закончена, а штреднї урожай коло 9,8 тони по гектаре.
Од вкупно 15 772 гектарох под кукурицу, по остатнїх податкох општинскей Канцелариї за польопривреду, кукурица виламана на 15 300 гектарох. Просекови урожай 9,8 тони по гектаре, а влажносц зарна медзи 18 и 21 одсто.
Од 1 300 гектарох под цукрову цвиклу, тота индустрийна рошлїна вицагана зоз 1 130 гектарох. На пожнєнє роботох вплївовала пременлїва и дижджовна хвиля. Роботи єст и кед слово о шатви жита, хторе, по планох, требало пошац тей єшенї на 5 430 гектарох, од того 380 гектари на польох польопривредних подприємствох и задруґох, а 5 050 гектари на польох польопривредних продуковательох.
На основи урядових податкох, дотераз под житом єст 4 167 гектари. Польопривредни подприємства и задруґи пошали вецей жита як цо плановане, вкупно на своїх поверхносцох маю 667 гектари. Алє, на польох парастох потераз єст менєй жита, бо од планованих поверхносцох пошали лєм 3 500 гектари.
Спомалшени и роботи коло пририхтованя польох за ярню шатву, бо од планованих 29 766 гектарох, поорани лєм 17 970 гектари.
Медзи парастами хтори пожня з роботу и Янко Хрчек зоз Шиду, хтори нам гварел же найвекшу часц поверхносцох под кукурицу виламал, а остала му менша поверхносц на дакус нєвигоднєйшей часци хотара. Медзитим, тото цо бриґує того параста, то же пожнєл зоз шатву жита.
– Нє паметам кеди ше таке случело же сом жито на час нє пошал – поносовал ше Хрчек. – Поля сом порихтал, алє сом пре дижджовну хвилю жито нє пошал благочасово. Щесце же и тераз у новембре було красни слунечни днї без паданя, та сом на концу жито и пошал на трох гольтох. Як ми гварели, слово о новей и добрей сорти, а за 100 кили будзем мушиц придац аж 700 килограми хлєбового зарна.
Лєпше би було кед бим поля после сої лєм потанїровал, як цо поробели велї, и вони на час пошали жито. Я рихтал польо так як треба, алє ме застановела нєвигодна хвиля. Правда и то же парасти хтори маю моцнєйши и нови трактори скорей пририхтали поля, та аж и у нєвигодних условийох – констатовал Янко Хрчек.