РУСКИ КЕРЕСТУР – Вчера, нєдзелю 25. априла по першираз бул отворени пункт за вакцинованє у Руским Керестуре. З тей нагоди вакцину продукователя Файзер-Бийонтек достали вкупно 204-еро гражданє котри ше пред тим штварток приявели до Месней заєднїци.
По словох секретара МЗ Михайла Пашу, вакцинованє орґанизоване релативно швидко за даскельо днї, з цильом же би ше могли вакциновац и тоти особи котрим можебуц бул проблем одход до Кули, а тиж ше нє мушело приявйовац анї на порталу еУправи.
Вакцинованє окончене у валалскей амбуланти, дзе були випочитовани шицки мири яки предписани пре епидемию, а бул обезпечени и превоз за старши особи.
Пункт нащивел и предсидатель Општини Кула Дамян Милянич котри з тей нагоди наявел же кед ше укаже потреба та иста акция будзе повторена.