АПАТИН – Всоботу, 26. октобра, катеди ФК „Русин” одбавели осме коло Першенства кадетскей лиґи процив реномираного ФК „Младосц” зоз Апатину з резултатом 2꞉1(0꞉0).
Перши полчас прешол у ровномирней борби обидвох екипох хтори закончени з нєришеним резултатом 0:0, а у другим полчасу, бависко обидвох екипох було вельо напартейше, окреме после 60. минути кед за Русин перши ґол дал Давид Надь. Од теди, судия хтори потамаль судзел цалком коректно, постава 12. бавяч домашнєй екипи.
Же судия очиглядно жадал оможлївиц побиду ФК „Младосц”, потвердзую два фаули хтори нє досудзени Русиновцом, а потим и покалїченє русинового бавяча, кед судия нє претарнул бависко же би на терен вишол лїкар. Така нєкоректносц у судзеню, вше фрустрирнши млади бавяче, та пре пригварки судийови, достали три жовти картони. У тих напартих 20 минутох по конєц змаганя, домашня екипа вировнала резултат на 1:1, а потим ше им у остатнєй минути зоз пеналу поспишело дойсц аж и до побиди. Треба визначиц же судия перше предлужел змаганє за два минути, а потим на седем, покля домашнї нє дали ґол.
Русин наступел у составе: Чордаш, Максимович, М. Ковачевич, Бодянец, Няради, Джуджар, Чонка, Н. Ковачевич, Тома, Попов, Надь, а у замени резервни ґолман Драґутинович. Тренере на змаганю: Зденко Шомодї и Владимир Хома.
Того викенду, кадети ФК „Русин” на домашнїм терену дочекаю кадетох ФК „Пиньвиц”, та з тей нагоди поволани шицки навияче Русину же би пришли потримац вредних и пожертвованих фодбалерох.
