КОЦУР – У огньогасним парку у Коцуре вчера отримана роботна акция на хторей обилєни древка и посадзени осемнац нови младнїки пауловниї, хтори коцурске Добрдзечне огньогасне дружтво (ДОД) достало на дарунок од Еколоґийного руху Вербасу.
На роботней акциї участвовала младеж ДОД, а предсидатель Еколоґийного руху Вербас Ратко Дюрдєвац огньогасцом отримал кратке преподаванє о пауловниї, як новей файти древа на тих просторох.
Коцурски огньогасци того року преславюю 85-рочнїцу од снованя Дружтва и у тим року маю циль посадзиц осемдзешат пейц младнїки древкох, з хторих велька часц уж посадзена праве у огньогасним парку, у улїци Ошлєбодзеня.