РУСКИ КЕРЕСТУР – За початок жатви жита над керестурским хотаром хибя два-три днї добрей хвилї, понеже диждж хтори ту нападал пондзелок, 29. юния – у дзепоєдних часцох хотара од 5 до 6 литри, та од 18 до 20 литри по квадратним метеру – оддалєл жатву хтора мала почац коло 1. юлия – виявел за Рутенпрес аґроном у „Юабрису” Владимир Тиркайла.
По обиходзеню хотара, Тиркайла утвердзел же жита нє єднак дозрети, та би жатва на перших поверхносцох, а то углавним тоти цо нє були пирскани, могла почац о даскельо днї, кед нє будзе паданя.
Як гварел, у керестурским хотаре єст и поверхносци з ище вше цалком желєним житом, хторому потребни голєм 7 до 10 днї з високу температуру, з понад 30 ступнї, же би дозрели за кошенє.