НОВИ САД – Вчера, 4. октобра, вецей як 12 000 учашнїки з 290 културно-уметнїцких дружвoх зоз Сербиї и реґиону у Новим Садзе одтанцовали „Вельке коло за Ґиниса”, так же пред представителями комисиї Ґинисовей кнїжки рекордох з Лондону – звалєли дотерашнї рекорд. Урядове потвердзенє о посцигнутим новим рекорду би о даскельо днї мало сцигнуц з Лондону.
Учашнїки ше после 15 годзин у народним облєчиве влапели до кола и одтанцовали „Вельке бачке коло”, „Катанку” и „Ужицке коло”. Круг хтори направели починал на Футожскей улїци, та ишол по Булеваре Княза Милоша, Булеваре войводи Степи и завар ше на Булеваре Европи, а бул длугоки 6 километри.
У „Вельким колє” участвовали и коло 30 младши и старши члени Руского културного центру Нови Сад, котри танцовали по Футожскей драги. До „Кола” ше приключели з ОШ „Милош Црнянски”, з єдней з 27 локацийох на хторих були змесцени велї дружтва.
На бини, на углє Булевару Йована Дучича и Княза Милоша, грал Народни оркестер Здруженя „Вельке коло” з Ветернику, хторе и инициятор и орґанизатор цалей манифестаци. На бини цали дзень були рижни концерти и наступи ансамблох зоз Сербиї и реґиону, а цала акция мала и гуманитарни характер, понеже була пошвецена борби процив диябетесу.
Манифестация отримана з потримовку Городу, городских управох, полициї, Червеного крижу, участвовали у нєй и числени волонтере, а отворела ю предсидателька Скупштини Городу Нови Сад Єлена Црноґорац.
У „Вельким колє” могли участвовац лєм тоти котри були у народним облєчиве, а после нього ше и гражданє, котри у барз вельким чишлє провадзели тото збуванє, и сами лапали до танцу.
