РУСКИ КЕРЕСТУР – У рускокерестурским хотаре внєдзелю, 12. юлия, закончена тогорочна жатва жита, хтора тирвала коло 10 днї, з менши прерву пре диждж хтори нападал прешлого тижня. Як гваря одкупйоваче, диждж нє начкодзел квалитету зарна и урожаю.
Мож повесц же того року витворени позарядово, аж рекордни урожаї, понеже ше рушали од 40 до прейґ 50 метери по гольту на польох парастох, а на польох подприємства „Юарбис” натлачене 8,75 тони по гектаре.
„Юарбис” одкупел прейґ 2 000 тони жита, подприємство „Аґрохома” прейґ 2 200 тони, „Млїностеп”, його Дїловна єдинка „Аґрокерестур” 2 325 тони, а жито одкупйовала и кулска „Житобачка”.
Жито векшини продуковательох уж и повиплацоване по 16 дин. за кґ з ПДВ, а и одкупйоваче и польопривреднїки ше наздаваю же конєчна цена будзе векша, та продуковательом будзе доплацена розлика.