КОЦУР – Преславйованє 250-рочнїци першей грекокатолїцкей церкви у Коцуре и 100-рочнїци приселєня часних шестрох служебнїцох до Коцура закончене всоботу, 29. авґуста зоз Шветочну академию у Велькей сали Дому култури у Коцуре, на хторей з музичнима, драмскима и литературнима точками дата чесц тим двом значним ювилейом.
Академию провадзел и представитель Управи за сотруднїцтво з церквами и вирскима заєднїцами при Министерстве правди Ґаврило Ґрба, та священство и часни шестри, а сала була полна з публику.
На початку домашнї Церковни хор Успения Пресвятей Богородици одшпивал вецей шпиванки, єдну шпиванку одшпивала и дириґентка того хору Єлена Алексич, а пригодни реферат на Шветочней академиї пречитал предсидатель Церковного одбору коцурскей церкви проф. др Михайло Фейса.
Програма була предлужена з драмску сличку школярох коцурскей основней школи, рецитациями, та музичнима и шпивацкима точками школярох музичней школи у Вербаше. На Академиї участвовали и Мария Горняк з рецитацию, писатель Силвестер Д. Макаї, як и музичаре Димитрий Цап на ґитари и Михал Будински на виолини.
На концу програми, хтору водзели Стеван Самочета и Мария Русковски, парох коцурски о. Владислав Рац привитал пана Ґаврила Ґрбу, котри з тей нагоди виражел задовольство же Министерство правди потримало тот ювилей. Шветочна академия закончена з многолїтствийом, хторе публика одшпивала вєдно з парохом и учашнїками.
