ШИД – Всоботу и нєдзелю, 13. и 14. фебруара, у Шидзе отримана традицийна привредно-туристична манифестация, 19. по шоре „Сримска забивачка и колбасияда”, на хторей було змаганя у вецей дисциплинох.
У швидким фаластовану швинї победзела екипа „Митин млїн” зоз 6,5 минути, а друга була екипа „Аґропапуку” зоз 7,4 минути. У тей дисциплини ше змагали лєм тоти два екипи.
У швидким єдзеню колбаси медзи пецерима змагателями найлєпши бул Милун Янкович з Беоґраду, а у конкуренциї екипох хтори правели швижи колбаси перше место освоєла екипа Йовици Буроєвича, друге Славка Ристича, а треце Небойши Петрича. Отримане змаганє и за найлєпшу курену колбасу.
На змаганю участвовала и екипа з Бикичу и їх госци з Бардейова, зоз Словацкей.
Манифестация була барз нащивена, а були на нєй и госци зоз Словениї, з Целя, як и зоз Горватскей, зоз Самобору и Хвару.