КОЦУР – Прешлого пиятку, 21. авґуста, у Основней школи „Братство-єдинство” у Коцуре отримана заєднїцка схадзка двох активох Дружтва за руски язик, литературу и културу вязаних за образованє по руски – Активу воспитачкох/вихователькох и Активу наставнїкох руского язика з наших местох.
Заєднїцка схадзка отримана у рамикох означованя 250-рочнїци рускей школи у Коцуре, означованя 110-рочнїци предшколского вихованя по руски у Коцуре, як и означованя 90-рочнїци народзеня писателя з Коцура Оскара Кочиша (1925-1983).
Попри вихователькох и наставнїцох руского язика з Руского Керестура, Коцура, Дюрдьова, Кули, Вербасу, Савиного Села, Бачкей Тополї, Нового Орахова, Нового Саду и Миклошевцох, з Горватскей, на схадзки присуствовала и мр Ядранка Коїч зоз Школскей управи Зомбор, Оддзелєня у Суботици, як и чолнїки Дружтва за руски язик, литературу и културу др Юлиян Рамач и Ирина Папуґа.
На схадзки двох активох розпатрани актуални питаня и предкладаня з обласци предшколского, основного и штреднього воспитаня и образованя по руски у 2015/16. школским року и о сотруднїцтве з часописом за дзеци „Заградка”, як и з другима медиями по руски.
По схадзки, присутни на теметове у Коцуре нащивели гроб писателя Оскара Кочиша и положели квеце, а о його литературней творчосци бешедовала и Кочишово стихи пречитала писателька з Коцура Серафина Макаї.
