НОВИ САД – Нєшка, 10. новембра, на новосадским СПЕНС-у почина штварти Саям жимнїци, здравей поживи и ремеселских продуктох.
Коло пейдзешат штанди за нащивительох буду отворени на першим поверху на 11 годзин, а на нїх буду понукнути рижни продукти: жимнїца, мед, чаї, продукти ручней роботи, еко-продукти – здрава пожива, природна козметика и вино.
З промоцию здравей поживи, Здруженє „Живот и здравє” на отвераню Сайму нащивительом понукнє безплатну закуску, а од 13 до 16,30 г. орґанизує Базар здравя, на хторим годно вимерац прицисок, голестерол и окончиц други здравствени препатрунки.
Саям жимнїци тирва по 14. новембер.