ДЮРДЬОВ – Дзень пред жимским розпустом, вчера у ПУ „Дюрдєвак” у Дюрдьове виховательки з дюрдьовскей и жабельскей предшколскей установи дзецом виведли новорочну представу, у хторей привитали Дїда Мраза. Вон дзецом подзелєл пакецики, а представа виведзена у шицких штирох предшколских установох у жабельскей општини и подзелєни вєдно 720 пакецики хтори обезпечела Општина. У Дюрдьове дзецом подзелєни 140 новорочни пакецики.
Вчера и у ОШ у Дюрдьове виведзена представа, алє хтору на власну инициятиву пририхтали школяре шицких трох оддзелєньох шестей класи котри виучую анґлийски язик, а з помоцу наставнїци анґлийского Александри Ристич. Вчера є виведзена школяром висших, а на початку другого полроча будзе одбавена и школяром нїзших класох.
Того тижня у дюрдьовскей школи подзелєни и 30 пакецики школяром самохраних родичох, та чийо родичи нє робя, лєбо маю здравствени проблеми, а нє доставаю социялну помоц. Достали их школяре од першей по шесту класу ОШ, а пакецики обезпечел Червени криж.