БАЧКА ПАЛАНКА – З нагоди Дня валалских женох, всоботу, 10. октобра, у Бачкей Паланки отримани „Саям творчосци валалских женох у Войводини”, хтори афирмує потенцияли и творчосц женох з руралних штредкох. Општину Кула на Сайме представяло Здруженє женох „Байка” з Руского Керестура.
Покраїнски секретар за привреду, обезпечованє роботи и ровноправносц полох Мирослав Васин оценєл же за остатнї даскельо роки активизем женох напредовал, та нєшка у Войводини єст коло 400 здруженя женох.
– З отримованьом тей манифестациї указуєме на моц войводянскей жени, валалу, войводянских вредносцох, мултиетнїчносци и мултикултуралносци. Нєшка на єдним месце маме вельо розлични култури, специялитети, ручни роботи хтори приказую дух и културу вецей як 26 националних заєднїцох – гварел Васин.
Визначел и же ше у Войводини рочнє отрима 1 200 манифестациї, з хторих 80 одсто орґанизую здруженя женох, лєбо су им пошвецени.
Пре обрацанє поваги на улогу женох на валалє, Ґенерална скупштина Зєдинєних нацийх 2007. року прилапела Резолуцию по хторей ше 15. октобер означує як Медзинародни дзень валалских женох.
