ЗВОРНИК/НОВИ САД – Всоботу, 11. септембра, ветеранє Руского културного центру (РКЦ) з Нового Саду участвовали на Пиятим медзинародним стретнуцу фолклорних ансамблох ветеранох „Будз щешлїви – танцуй фолклор” у Зворнику, на хторим участвовали културно-уметнїцки дружтва зоз Сербиї и Републики Сербскей.
Ветеранє РКЦ одтанцовали хореоґрафию „Руски танци”, хореоґрафа Миломира Шайтоша, а наступ бул попровадзени зоз моцним аплаузом и обачлївим одушевийом публики.
Госцох ше привитало у Основней школи „Святи Сава”, а програма отримана у Рекреативно-спортским центру у Зворнику, дзе ше у танцу и шпиванки, єдни за другима, зменьовали ветеранє у народним облєчиве зоз свойого краю.
На тогорочним стретнуцу любительох народного танцу и шпиванку наступели дзевец културно-уметнїцки дружтва и вецей як 200 фолклораше зоз реґиону, а пре актуалну ситуацию зоз епидемию велї Дружтва ше одволали на поволанку, алє участвовали делеґацийно.
Учашнїки мали и нагоду прейсц ше по городзе, обисц историйни памятнїки у Зворнику, як и „Поджемни город Карадьордьовичох” у Малим Зворнику.
Стретнуце отримане под покровительством городу Зворник, а у орґанизациї Сербского просвитного и културного дружтва „Просвєта”.
После концерту шицки фолклораше ше вєдно предлужели дружиц у Святочним салону „Royal” у месце Табанци (Република Сербска), насампредз зоз приємнима домашнїма зоз хторима и почерали пригодни дарунки.