Седмеро рецитаторе по руски освоєли пласман на Зонску смотру

автор маф
1.2k Опатрене

КРУЩИЧ – На вчерайшей Општинскей смотри рецитаторох кулскей општини Ребека Семан освоєла друге место у младшим, Матей Шепински тиж друге у штреднїм, а Тимеа Будински треце место у старшим возросту, шицки з Руского Керестура. Попри нїх, з Керестура ше на Зонску смотру пласовали и Микола Еделински и Валентина Новта у штреднїм, та Леонтина Штефанко у старшим возросту, як и Дияна Канюґа з Кули у штреднїм возросту, котра тиж рецитовала по руски.

Попри спомнутих, з Руского Керестура на Смотри участвовали и Марко Ковачевич, Иван Планчак (у младшим) и Мария Малацко у старшим возросту.

На 48. Општинскей смотри рецитаторох „Максим Єкнич” участвовали 34-еро рецитаторе у трох возростох, найвецей з Кули и Керестура, а рецитаторе ше змагали по сербски, руски, мадярски и по українски. Селектор Смотри бул ґлумец Сербского народного театру з Нового Саду Миодраґ Петрович, консултатнт за руски язик Михайло Зазуляк, а за мадярски Юлия Дорокхази Киш.

Перше место у младшим возросту освоєла Александра Ковиянич, а треце Биляна Митрич, обидва з Кули, у штреднїм возросту перша була Исидора Нинков з Кули, а треца Владица Кляїч з Червинки, док у старшим возросту победзела Сузана Тошич, а друге место освоєл Неманя Ковиянич, обидвойо з Кули.

У шицких трох возростох з кулскей општини ше на Зонску смотру пласовал аж 21 рецитатор, а дальше змаганє будзе у дньох идуцого викенду у Бачу.

Госц на Општинскей смотри бул познати поета за дзеци Неделько Попадич, а орґанизаторе Културно-просвитна заєднїца Општини Кула и домашнї КУД „Крущич”.

ПОВЯЗАНИ ТЕКСТИ