КАНЇЖА – Седмеро школяре Школи Петро Кузмяк, з Руского Керестура, вєдно зоз педаґоґу Марину Дудаш, концом юния участвовали на штиродньовей манифестациї под назву Камп мултикултурализма, Канїжа.
Манифестацию орґанизує Покраїнски секретарият за образованє, предписаня, управу и национални меншини – национални заєднїци, а отримує ше ю у рамикох проєкту Покраїнскей влади Афирмация мултикултурализма и толеранциї у Войводини.
На змаганю участвовали осем екипи, а од бавискох мали – воженє бициґлох, цильованє до метох, складанє пузлох, складанє танґраму, школяре ше змагали и у квизох знаня, глєдали скрити локациї по варошу и ришовали задатки, а змагали ше и у бавискох на води.
Основну и штредню школу зоз домом школярох Петро Кузмяк, на тот завод представяли шлїдуюци школяре – Валентина Гарди, Йована Фаршанґ, Исак Новта зоз I-1 оддзелєня, Ива Сабо и Максим Катона зоз II-1 оддзелєня, як и Лана Лукета и Милица Трифунович зоз II-2 оддзелєня.
На концу, победзела такволана цможелєна екипа, у хторей бул школяр Исак Новта, як и педаґоґа Марина Дудаш, хтора и предводзела побиднїцку екипу. Побиднїкох тераз чека наградне путованє до иножемства.
Основна идея того подпроєкту, понукнуц нагоду школяром штреднїх школох зоз териториї цалей Войводини, же би ше у рамику вецей штиродньових кампох дружели, медзисобно упознали и змагали у популарних бавискох схопносци и знаня. Циль тей манифестациї афирмовац позитивни вредносци мултикултурализма и промововац медзисобни соживот заєднїцох на териоториї АП Войводини.
