ПЕТРОВЦИ – У рамикох 35. Спортских бавискох „Яша Баков”, внєдзелю, 5. юлия на стадиону НК „Петровци” у Петровцох, отримани Турнир у малим фодбалу 3 на 3.
На турниру участвовали осем екипи, хтори були подзелєни до двох ґрупох, по штири екипи. После одбавених змаганьох у ґрупней фази, шлїдзела нокаут фаза, дзе на концу екипа Искри зоз Коцура була лєпша и победзела у финалним стретнуцу екипу Пакт Рутенорум зоз Руского Керестура, а конєчни резултат бул 3:0.
После одбавеного Турнира у малим фодбалу 3 на 3, було и змаганє у копаню пеналох, а найлєпши бул Саша Загорянски зоз екипи РКЦ з Нового Саду, друге место припадло Сашови Голикови зоз екипи НК „Петровци”, а треце место завжал Михайло Грищук зоз екипи КУД „Яким Гарди” зоз Петровцох. За освоєни перши три места, бавяче достали дипломи и медалї.
Екипи хтори ше змагали на 35. Спортских бавискох у малим фодбалу 3 на 3 у Петровцох то: ФК „Искра” зоз Коцура, Д.О.О. Хидрия зоз Петровцох, Пакт Рутенорум зоз Руского Керестура, РКЦ зоз Нового Саду, Роковци – Андрияшевци, Петровци 1 зоз Петровцох, НК „Петровци” и КУД „Яким Гарди” зоз Петровцох.
На змаганьох судзели судийове Томислав Чачич и Иван Славка зоз Вуковару.
Турнир почал зоз минуту цихосци за нєдавно упокоєного Юлина Джуню, длугорочного учашнїка и донатора Спортских бавискох „Яша Баков”, а после турнира делеґация запалєла швичку на його гробе.
