БЕОҐРАД – У тогорочней ярнєй шатви у Сербиї зоз житарками пошати коло милион 600 000 гектари, а найвецей кукурици – на милион гектарох, док соя пошата на коло 200 000 гектарох. Шлїдзи слунечнїк, хторого єст на коло 180 000, жито на коло 165 000 и цукрова цвикла на коло 55 000 гектарох – гварел за Танюґ член Одбору за валал Сербскей академиї наукох и уметносцох Бранислав Ґулан.
Ґулан бешедовал и о вивозу-увозу польопривредних продуктох, та так у 2015. року Сербия вивезла 492 443 тони жита, а увезла 1 287 тони, док ярцу вивезла 54 450 тони, а увезла 3 332 тони.
Сербия спада медзи дзешец найвекших шветових вивожнїкох кукурици, та прешлого року зме вивезли два милиони 190 716 тони кукурици, а увежена 7 381 тона.
Прешлого року зазначени и значни вивоз сої – 134 814 тони, а увежена 98 101 тона, док цукровей цвикли прешлого року вивежени 98 222 тони. Попри тим, Сербия ма и контиґент за вивоз 181 000 тони цукру до Европскей униї (ЕУ).
Ґулан спозорел и на барз мали вивоз целячини, бо прешлого року вивежени лєм 315 тони, док 1990. року вивоз целячини бул 100 раз векши, понеже теди вивежени 30 000 тони. Як гварел, Сербия од 1996. року ма дозволу за вивоз 8 875 тони „беби-бифу” до ЕУ.
Прешлого року з аґрарного вивозу вєдно достати 2,8 милиярди долари, а увежене роби за 1,5 милиярди, так же заробок бул 1,3 милиярди долари.
Ґулан бешедовал и о опадованю трошеня меса и хлєба, та гварел же наша жем рочно випродукує коло 80 000 тони говедзини, а трошенє того меса по жительови менша од 4 кили. Вообще, нєшка ше по жительови Сербиї троши коло 38 кґ меса, а 1990. року то було 65 кґ.
За 17,97 кґ опадло и трошенє хлєба по жительови, з чим ше Сербия приблїжела европским стандардом, гварел Ґулан. Як указую податки, 2006. року за 365 днї кажде у Сербиї поєдол по 101,5 кили хлєба, а 2015. року то було 83,71 кґ хлєба.